Iniciativa pol Asturianu reclama al Gobiernu asturianu qu’entame de forma urxente la tramitación parllamentaria del Plan de Normalización. La Conseyería de Cultura, Política Llingüística y Deporte informó nel mes d’abril de que’l documentu “taba mui avanzáu”. Sicasí, a pocos meses de llegar a la primer metá de la llexislatura, sigue pendiente aprobar un plan que permita conocer los oxetivos del Gobiernu nesti ámbitu asina como poder evaluar si se tán cumpliendo.
Asturies nun tien un plan de normalización vixente dende va cuasi venti años. Pa l’asociación de reivindicación llingüística paez inesplicable qu’un gobiernu sofitáu por fuercies parllamentaries que lleven la oficialidá y la normalización del asturianu nel programa electoral, nun dea esti pasu tan necesariu p’avanzar na normalización de les llingües propies, y polo tanto, na so supervivencia.
Iniciativa pol Asturianu considera que nun puede terminar esti añu ensin que se ponga en marcha un plan de normalización que tien de ser ambiciosu y llevar hasta’l máximu’l marcu llegal actual, que s’alcuentra na Llei d’Usu y Promoción del asturianu. Mientres ye necesario tamién avanzar nel procesu de reforma estatutaria pa llograr la oficialidá.
Al paecer d’Iniciativa pol Asturianu son estos dos procesos qu’han dir en paralelu, pa, per un llau, buscar una solución constitucional definitiva pal asturianu, y per otru, dar solución inmediata a la necesidá d’avances inmediatos pal usu y la protección del asturianu y l’eonaviegu.
