Iniciativa pol Asturianu entamana esti sábadu, 15 d’agostu, en collaboración cola Cámara de Comerciu de Xixón, la V edición del Día de la Llingua Asturiana na Feria Internacional de Muestres d’Asturias (FIDMA), una xornada dedicada a visibilizar la llingua y la cultura asturiana al traviés d’una programación qu’axunta actividaes culturales, divulgatives y reivindicatives en distintos espacios de la feria.
El día va entamar a les 12:00 hores, na entrada principal del recintu ferial, cola inauguración institucional y el pregón, que va correr a cargu del periodista y escritor Pachi Poncela. Nel mesmu actu va intervenir la presidenta d’Iniciativa pol Asturianu, Arantza Margolles. La apertura musical va correr a cargu de Leyre y Noa Miyar, que van poner música a la xornada col curdión y la gaita, respectivamente.
A les 13:00 hores va realizase una visita institucional al stand d’Iniciativa pol Asturianu. A la mesma hora, nel pabellón de Xixón, Marta Lozano va ufiertar una visita guiada n’asturianu.
La programación va continuar a les 13:30 hores, nel stand d’El Comercio, cola proyección del documental «50 años de la manifestación de Conceyu Bable», que recueye una movilización considerada fundamental na historia contemporánea del movimientu de reivindicación llingüística asturiana. La
Yá pela tarde, a les 17:00 hores, el stand de Carreño va acoyer el repartu de marañueles de Candás, reivindicando tamién la presencia de la denominación n’asturianu d’esti productu tradicional. A la mesma hora, nel pabellón del Conceyu de Xixón, va desarrollase «El pan nun se tira. Tresfórmase», una propuesta inspirada nel proyectu «El pan como cultura, el pan como creación, el pan como futuru», de Laboral, Ciudá de la Cultura, con un showcooking a cargu de Panduru.
A les 18:00 hores, el stand del Conceyu de Mieres va ser l’escenariu d’un cuentacuentos pa la reciella protagonizáu por Andrea Lobo, con música, títeres y cuentos tradicionales.
La programación va siguir a les 19:00 hores, nel espaciu de Conceyos Prestosos, cola presentación del últimu númberu de la revista Ver Asturies, publicación de calter turísticu, cultural y gastronómicu n’asturianu.
Unu de los actos centrales de la tarde va llegar a les 20:00 hores, nel stand de La Nueva España, col alderique «15 años d’Iniciativa pol Asturianu», una charra-alderique na que van participar los tres presidentes que tuvo la organización: Inaciu Galán, Iván Llera y Arantza Margolles, nun alcuentru moderáu pola vicepresidenta de la entidá, Claudia Elena Menéndez. L’actu va permitir facer un repás pola trayectoria de la organización, la evolución del movimientu de reivindicación llingüística y los principales retos de futuru pal asturianu.
Amás, durante tol día, nel espaciu del Conceyu d’Avilés, dientro del stand de Conceyos Prestosos, va poder participase na propuesta «Xugando a les Pallabres Prestoses», cola que les persones visitantes van poder xugar cola llingua asturiana y participar nel sortéu d’un detallín.
La xornada va rematar a les 21:00 hores, nel propiu stand d’Iniciativa pol Asturianu, col soplíu de veles polos 15 años de la organización.
Iniciativa pol Asturianu anima a la ciudadanía a participar nesta V edición del Día de la Llingua Asturiana na FIDMA, que vuelve convertir la Feria Internacional de Muestras d’Asturias nun espaciu de difusión, usu y reivindicación de la llingua asturiana, amosando la so presencia en ámbitos tan diversos como la música, la cultura, la gastronomía, el patrimoniu, la creación audiovisual y l’actividá social.
Cartelu y programa y V Día de la Llingua Asturiana na FIDMA
