Iniciativa pol Asturianu denuncia’l recorte d’hores de Llingua Asturiana y Lliteratura y l’agrupación de niveles que se ta produciendo en dellos centros educativos concertaos d’Asturies, una situación que, según la organización, afecta yá a más d’once centros.
En concreto, na etapa de Secundaria tán agrupándose alumnos y alumnes de distintos niveles nun mesmu grupu, una situación que dificulta de manera importante’l trabayu docente al tener que desarrollar nun mesmu espaciu conteníos curriculares diferentes y adaptaos a distintes edaes y niveles. Amás, l’agrupación de niveles supón una torga organizativa pa los centros, qu’en algunos casos ta suponiendo’l cambiu d’optatives del alumnáu. Pa Iniciativa pol Asturianu, esta situación ye mui grave y compromete’l normal desarrollu de la materia y les condiciones nes que l’alumnáu recibe la enseñanza.
La organización de reivindicación llingüística considera, amás, que l’agrupación de niveles proyecta una imaxe negativa de l’asignatura y puede tener un efectu perxudicial sobre la so matrícula nos próximos cursos académicos. «Nun se pue tratar l’asturianu como una asignatura de segunda categoría nin aplicar recortes que nun se plantegaríen d’igual manera n’otres materies», señala la entidá.
Iniciativa pol Asturianu recuerda que la materia de Llingua Asturiana y Lliteratura cuenta con unos oxetivos y contenidos curriculares propios y que la so enseñanza tien que desenvolvese coles mesmes garantíes de calidá que cualquier otra materia. Estes condiciones, señala la organización, tienen que garantizase independientemente del modelu de centru escoyíu poles families.
La organización reclama a la Conseyería d’Educación del Principáu d’Asturies una respuesta áxil ante esta situación y que se garantice la recuperación de les hores correspondientes a cada nivel, evitando l’agrupación d’alumnáu de distintos cursos por razones exclusivamente económiques.
Iniciativa pol Asturianu recuerda que, hai unos díes, los centros educativos recibieron la circular d’iniciu del cursu 2026-2027, na que se recueye expresamente’l compromisu de «siguir fomentando la enseñanza del asturianu y del eonaviegu en toles etapes educatives».
Pa la organización, les decisiones de recorte d’hores y agrupación de niveles nun son coherentes con esi compromisu. Por ello, reclama que’l Principáu d’Asturies dote de los recursos presupuestarios necesarios a los centros pa garantizar la contratación del personal docente suficiente y asegurar una enseñanza del asturianu y del eonaviegu en condiciones d’igualdá, calidá y dignidá pa tol alumnáu.
