Iniciativa pol Asturianu critica l’actitú caltenida pol Partíu Popular de Ḷḷena nel últimu plenu ordinariu del Conceyu, nel qu’ún representante de la formación popular emitió comentarios pa impedir l’usu del asturianu con comentarios absurdos y ridículos comparando la utilización de la llingua asturiana col ‘grecochipriota’.
La organización de reivindicación llingüística quier treslladar, en primer llugar, el so reconocimientu al conceyal de Compromisu por utilizar con normalidá l’asturianu nuna institución democrática y recuerda que la llibertá llingüística implica tanto’l derechu a utilizar una llingua como’l derechu a nun facelo. Naide ta obligáu a falar asturianu, pero tampoco habría de cuestionase, bloquiar o utiliza como motivu de confrontación política qu’un representante públicu decida espresase na llingua propia d’Asturies.
Pa Iniciativa pol Asturianu resulta especialmente preocupante qu’una intervención n’asturianu se convierta en motivu pa amenazar con abandonar una sesión plenaria. Un plenu municipal tien de ser un espaciu de pluralidá, respetu y representación de tola ciudadanía, y el debate políticu habría de centrase nel conteníu de les intervenciones y de les propuestes, non pol idioma na que estes se realicen.
La organización recuerda amás que l’usu del asturianu nes instituciones municipales nun ye una cuestión ayena a la realidá xurídica y normativa de Ḷḷena. El Conceyu cuenta con una Ordenanza Municipal pal usu de la Llingua Asturiana, que reconoz y regula la utilización de la llingua propia nel ámbitu municipal. Por ello, Iniciativa pol Asturianu considera especialmente difícil de comprender que se pretenda convertir precisamente’l so usu nun conflictu dientro de la mesma institución.
La entidá considera, amás, que esta actitú contrasta col discursu que’l propiu Partíu Popular d’Asturies caltién públicamente en rellación cola llingua asturiana. El so presidente, Álvaro Queipo, defendió que les llingües asturianes son un patrimoniu de tolos asturianos y que’l PP apuesta pol so «usu en llibertá», amás de señalar que les llingües tienen de ser un elementu d’unión y convivencia y non un «arma arroxadiza».
Por ello, Iniciativa pol Asturianu reclama a Álvaro Queipo que clarifique si esi «usu en llibertá» inclú tamién que un conceyal pueda utilizar llibremente l’asturianu nel plenu del so Conceyu. La organización considera que qu’esiste una evidente contradicción ente defender públicamente la llibertá d’usu de la llingua y que representantes del so partíu pretendan abandonar una sesión plenaria precisamente porque otru conceyal ta faciendo usu d’ella.
Esta contradicción resulta entá más llamativa si se compara cola posición que’l Partíu Popular caltién n’otros territorios. Mientres el PP de Galicia presumía ayer ir d’algamar un consensu políticu pa impulsar un nuevu plan de normalización llingüística, el PP de Ḷḷena convierte l’usu del asturianu per parte d’un representante públicu en motivu d’enfrentamientu dientro del órganu democráticu de representación municipal.
La organización de reivindación llingüística considera que lo asocedío en Ḷḷena supón una falta de sensibilidá llingüística y, sobre too, una falta de respetu hacia un miembru de la propia corporación municipal que taba exercitando’l so derechu a espresase na llingua asturiana.
Por ello, reclama al Partíu Popular d’Asturies una posición clara énte lo asocedío y pide a la so dirección que garantice que’l discursu de defensa del «usu en llibertá» de les llingües asturianes s’aplique tamién nos conceyos onde gobierna o cunta con representación.
P’acabar, Iniciativa pol Asturianu recuerda que l’asturianu nun pue convertise nuna llingua que se defende namás cuando resulta políticamente conveniente. Si realmente se considera patrimoniu de tolos asturianos, como señaló’l propiu presidente del PP asturianu, tien de poder tar presente tamién nes nueses instituciones, nos nuesos conceyos y nos nuesos plenos, cola mesma normalidá cola que forma parte de la sociedá asturiana.
