Iniciativa pol Asturianu fai una valoración xeneral positiva de la presencia de la llingua asturiana na 68.ª Feria Internacional de Muestres d’Asturies (FIDMA), anque considera que siguen esistiendo espacios onde’l tratamientu del idioma ta mui llueñe de responder a la realidá llingüística d’Asturies y a los compromisos asumíos poles instituciones públiques.
La organización destaca de manera especial el espaciu del Principáu d’Asturies, onde l’asturianu cuenta con una presencia digna y visible, integráu con normalidá nel conxuntu de la esposición. Del mesmu mou, valora la recuperación del usu de la llingua asturiana nel espaciu de la Universidá d’Uviéu y apunta que, por primer vegada, l’Autoridá Portuaria de Xixón emplegue la toponimia oficial del conceyu nel so espaciu espositivu.
Tamién merecen una valoración positiva los espacios d’otros conceyos, como’l d’Mieres o’l de la rede de Conceyos Prestosos, onde l’asturianu forma parte de la comunicación cola ciudadanía. A ello súmase la presencia del idioma nel espaciu del diariu dixital MiGijón, que presenta distintos conteníos informativos n’asturianu nos paneles instalaos nel certame.
Sicasí, Iniciativa pol Asturianu considera especialmente preocupante’l casu del pabellón municipal de Xixón. La organización entiende que la presencia del idioma queda reducida a unos códigos QR que remiten a la información n’asturianu, obligando a les persones visitantes que deseen facer el percorríu nesta llingua a utilizar el so teléfonu móvil pa poder acceder a unos conteníos que sí tán visibles de manera directa n’otres llingües. Pa la organización, esta solución nun garantiza una presencia real nin una igualdá de tratu del asturianu.
La situación nel espaciu del Conceyu d’Uviéu tampoco supón un cambéu relevante. Iniciativa señala que la presencia del idioma reduzse al emplegu del lema «Amabilidá», venceyáu a la candidatura de la ciudá como Capital Europea de la Cultura, ensin que s’aprecie una incorporación más amplia de la llingua nel restu de la esposición.
No tocante a empreses públiques y organismos dependientes de les alministraciones, la organización destaca positivamente la presencia del asturianu n’entidaes como ITVASA, qu’amás respeta la toponimia oficial nel mapa de les sos estaciones, el Consorciu d’Agües d’Asturies o COGERSA, demostrando que ye posible incorporar les llingües propies con normalidá na comunicación institucional.
Pela cueta, Iniciativa pol Asturianu considera especialmente llamativu’l casu de la Dirección Xeneral de Vivienda, dependiente de la Conseyería d’Ordenación del Territoriu. La organización recuerda que les Directrices d’Usu y Promoción del Asturianu y del Eonaviegu y la Estratexa de Normalización de les Llingües Propies, aprobaes pol Gobiernu del Principáu, afecten al conxuntu de la Alministración autonómica. Por ello, resulta incomprensible qu’un departamentu que depende d’una conseyería xestionada por Convocatoria por Asturies-IU nun presente nengún conteníu nes llingües propies d’Asturies.
La organización de reivindicación llingüistica considera fundamental que conceyos como Ayande, Villaviciosa, Carreño o Llanera tienen qu’apostar de manera decida pola inclusión del asturianu nos sos respectivos espacios.
Iniciativa pol Asturianu recuerda que la FIDMA ye’l mayor escaparate comercial ya institucional del país y considera que les alministraciones públiques tienen la responsabilidá d’incorporar l’asturianu con normalidá na so comunicación pública. La organización entiende que los avances d’esta edición demuestren que ye posible dar una presencia digna y visible al idioma, pero considera que siguen esistiendo instituciones que tienen pendiente asumir con convicción esti compromisu.
