Intervención de la vocal d’Enseñu d’Iniciativa pol Asturianu, Marta Mori, en sustitución de la presidenta d’Iniciativa pol Asturianu.
Autoridaes, representantes empresariales, medios de comunicación, amigos, amigues y compañeros de llucha, bonos díes.
Güei, equí, nesti Día de la Llingua Asturiana na Feria Internacional de Muestres d’Asturies, cita irrenunciable del branu asturianu y xixonés, Iniciativa pol Asturianu preséntase con una doble emoción. Per un llau, la de tar presentes un añu más nel mayor escaparate comercial, social ya institucional del nuesu país. Per otru, la d’algamar esti añu un fitu mui especial: cumplimos 15 años de trabayu ininterrumpíu pol nuesu idioma.
Quince años d’esfuerzu coleutivu, de compromisu y de presencia constante en cada rincón d’Asturies. Quince años nos qu’atestiguamos cómo la sociedá asturiana avanza ensin complexos hacia la normalización y nos que tamos consiguiendo que cada vegada más xente use l’idioma nel so día a día. Esto, que dalgunos podríen discutir, sabémoslo bien, y de primer manu, nun solamente pola bayura de xente que cada añu s’apunta a los nuesos cursos del idioma sinon tamién al traviés d’ferramientes como’l nuesu Buzón del Asturianu. Dos formes distintes, pero dambes útiles pa conocer de manera vecera’l sentir direutu de la xente. Sabemos de primera manu l’amor y la voluntá de caltenimientu que tien una mayoría cada vegada más fuerte de la población asturiana pola so llingua.
Son motivos pa ser optimistes, sí, pero non por ellos tenemos de tar tentaos a escaecer les coses non tan buenes, a escaecer qu’una organización como la nuesa tien, tamién, de dexar constancia de lo malu. Bona amuesa, y la más reciente que tenemos, ye esta edición númberu 69 de la Feria de Muestres. Nella alcontramos un pocoñín de cal y otru pocoñín d’arena que convien considerar. Espacios como’l del Principáu d’Asturies o’l de la Universidá d’Uviéu, Mieres, MiGijón o Conceyos Prestosos, onde l’asturianu cuenta con una presencia digna, visible ya integrada con total normalidá, llénennos d’arguyu, asina como el xestu históricu que supón que, per primera vegada, l’Autoridá Portuaria de Xixón emplegue la toponimia oficial del conceyu na so muestra. Una rara avis, por ciertu, nos últimos años n’esta ciudá que, no personal, duelme especialmente por ye la mía, y na que la toponimia, bien por ideoloxía o bien por dexadez, desaparez como por arte de maxia de los cartelos denda va yá un tiempu importante y preocupante.
Sicasí, otres muestres dan un balance más negativu, entá mui llueñe de responder a la realidá llingüística d’Asturies y a los compromisos asumíos poles instituciones dende cuantayá. Concretamente, dende va cuasi 30 años, cuando, nel 1998, y baxo’l paragües d’un gobierno autonómicu de drecha, la Llei d’Usu y Promoción del asturianu dispuso una proteición munches vegaes escaecida. Falaba enantes del casu de Xixón, onde s’evita l’asturianu na inauguración d’una cai como la dedicada a Igor Medio, figura señera ya indisociable de la llucha pol idioma. Asina mesmu, nel so pabellón n’esta feria l’asturianu ocúltase tres de los códigos QR, arrincónase, como va años arrinconábase dientro les cases na creencia de que yera vergoñosu falalo públicamente. Otru tantu ocurre, de forma sorpresiva, nel estand de la Direición Xeneral de Vivienda, qu’escaez l’idioma entá dependiendo d’una conseyería xestionada por Convocatoria por Asturies-IU. L’asturianu nun esiste namái pa rellenar programes ellectorales. Tamién ta cumpliles.
Pero bien. Pese a estos desaxustes, esti camín sigue marcando pasos alantre. Nun podía ser d’otra manera: el sentir de la sociedá siempres acaba, tarde o tempranu, imponiéndose. Nel ámbitu educativu, celebramos esti añu el fitu históricu de la creación de la especialidá de llingua asturiana, un pasu de xigante que va apurrir estabilidá llaboral a más de 300 docentes interinos. Cellebrándolo, naguamos por entamar a trabayar nesti llogru darréu pa faelo efeutivu de forma urxente. Vivimos, creo que tolos presentes equí lo sabemos, tiempos de futuru inciertu nel que nun tenemos nin un solo día de tregua que perder.
Paralelamente, el sector priváu ta demostrando un dinamismu exemplar. Cada vegada son más les empreses qu’usen l’asturianu como llingua vehicular, como se puede comprobar nel nuesu propiu stand nesta feria. Nun tan toles que son, pero creo sicasí que, a lo menos les que tan, merecen mención: Al Otru Andar, Básico Estudio, Cartonaxes VIR, Cerveza Caleya, Cooperativa Astuenerxía, Cuatro Gotes Producciones, Ediciones Radagast, Editorial Pintar Pintar, Editorial Trabe, La Fabriquina Creaciones Culturales, La Semeya Editorial, Nordés Móvil y Panduru Repostería Circular.
Nesti mesmu sen, valoramos positivamente la creación por parte del Principáu d’Asturies de la marca Alfaya, y queremos reconocer la labor imprescindible de Empreses pol Asturianu, que de forma altruista puxa polos derechos d’una clase empresarial que entiende que’l nuesu idioma ye tamién un valor amestáu de calidá y futuru.
Toos estos avances son motivos d’arguyu. Y yá ven qu’esti añu, anque nun escaezamos la importancia de la quexa, son más los puntos buenos que los malos. Pero nada d’esto nos puede distrayer de la nuesa gran exa y nodu central: algamar la OFICIALIDÁ. Tolo dicho anteriormente son pasos necesarios, pero ensin el blindaxe xurídicu de la oficialidá, el nuesu idioma va siguir en situación d’invisibilidá y vulnerabilidá.
La oficialidá ye un compromisu éticu, democráticu ya irrenunciable que nun puede ser tapáu por nada más. Nun nos valen los parches, les bones intenciones nin los papeles moyaos. Asturies precisa que les sos llingues propies, tanto l’asturianu como l’eonaviego, seyan reconocíes colos mesmos drechos y deberes que cualesquiera otra llingua oficial del Estáu español.
Na parte que nos toca, dende Iniciativa pol Asturianu vamos siguir trabayando con rigor, proposición y firmeza, como llevamos faciendo estos 15 años. Gracies a les persones, empreses ya instituciones que yá dieren el pasu, y un llamáu d’atención a les que inda dulden: l’asturianu ye de toes y de tos; el nuesu meyor escaparate. Los nuesos raigaños, sí, pero tamién el nuesu futuru.
Pola oficialidá, pola normalización y polos drechos llingüísticos d’Asturies, seguimos na llucha.
Munchas gracies.
