La Facultá de Formación del Profesoráu y Educación de la Universidá d'Uviéu va acoyer el martes 25 de marzu, a lo llargo de tol día, una xornada embaxo'l títulu "La situación de la llingua asturiana nel sistema educativu n'Asturies". Iniciativa pol Asturianu collabora con esti actu dirixíu al públicu en xeneral y n'especial a profesoráu del sistema educativu asturianu, pudiendo inscribise pa recibir un certificáu d'asistencia.
Yá pue sentise un nuevu programa d'Iniciativa pol Asturianu nes Ondes. El Conceyu d'Estorga, en Lleón, y l'Asociación Cultural Faceira entregaron los gallardones del so primer Certame Lliterariu Astúrica, un premiu de rellatu y poesía qu'organicen dende les tierres llioneses con intención d'aportar a tol dominiu llingüísticu dende Asturies a Miranda del Douro. Ente los cinco ganadores d'esta primer edición, hai trés mozos y moces asturianes, Inaciu Galán, Naomi Suárez ya Irma González-Quevedo. P’afondar na conocencia d’esta entidá dedicada al estudiu, divulgación y protección del patrimoniu cultural, históricu y llingüísticu de Llión, tamos en contautu al traviés de la llínea telefónica con Ricardo Chao, secretariu de Faceira.
Como ye vezu y compromisu de l'actual Direutiva, abrimos el próximu aconceyamientu a l'asistencia y participación de tolos asociaos. Sedrá'l sábadu 15 de marzu a les 18 hores na Sociedá Cultural Xixonesa, na cai Balmonete Miranda, 4, Xixón. L'orde del día apurrióse yá a los asociaos peles víes que son vezu.
Yá tán equí toles noticies d'Iniciativa pol Asturianu nel mes caberu, nel boletín informativu #28.
Iniciativa pol Asturianu nes ondes entrevista nesti casu a Toño Martínez, llicenciáu n'Hestoria, Master n'Hestoria y Analís Sociocultural y anguañu Doctorandu n'Investigaciones Humanístiques, ta preparando’l proyeutu d'investigación sobre Sidra, ociu y sociabilidá en Siero y Noreña (1875-1937) too ello na Universidá d'Uviéu.
El proyectu televisivu d'Iniciativa pol Asturianu en collaboración con Infoasturies.net y Conocer Asturias, apurre nuevos conteníos na so canal de YouTube: entrevistes col artesanu cerveceru Serxu Solares y la cantante Silvia Quesada, y l'avance d'un alderique con ciclistes y xente d'esti deporte bien popular n'Asturies.
Inaciu Galán, presidente d'Iniciativa pol Asturianu, y Sabel Tuñón, vocal voluntariáu de la organización, aconceyaron el xueves 6 de febreru cola directora de la Fundación Príncipe d'Asturies, Teresa Sanjurjo, nel llar d'esta organización. A lo llargo del conceyu felicitóse a la entidá por entamar a usar l'asturianu col primer pasu dau al asoleyar n'asturianu y gallego-asturianu les bases y fiches d'inscripción nel Premiu al Pueblu Exemplar d'Asturies, anque se recordó a la entidá "lo curtio d'esti pasu dau y la necesidá d'una mayor implicación de la FPA nel usu del asturianu".
Hasta'l 9 de marzu ta abiertu'l plazu pa presentase a esti concursu nel qu'Iniciativa pol Asturianu collabora cola asociación Abierto Hasta el Amanecer. El concursu ¿Qué cuentes...? entamáu por esta entidá permite presentar testos n'asturianu a concursu.
Falóse nesti programa de medicina, col autor de la tesis doctoral "La Medicina Popular a través de la Lengua Asturiana”, Francisco Fernández-Guisasola, que denfendió la necesidá de que los médicos conozan la llingua asturiana, l'idioma de munchos de los pacientes asturianos.
Nesta edición d'Iniciativa pol Asturianu nes ondes, María Esther García López, conceyala de cultura y educación de Castrillón, por Izquierda Xunida, que gobierna nel conceyu, denuncia que nun pue espresase n'asturianu nel plenu por mor de que-ylo pidieron dempués de que los funcionarios del mesmu allegaren nun saber asturianu pa facer l'acta.