Inaciu Galán, presidente d'Iniciativa pol Asturianu, y Sabel Tuñón, vocal voluntariáu de la organización, aconceyaron el xueves 6 de febreru cola directora de la Fundación Príncipe d'Asturies, Teresa Sanjurjo, nel llar d'esta organización. A lo llargo del conceyu felicitóse a la entidá por entamar a usar l'asturianu col primer pasu dau al asoleyar n'asturianu y gallego-asturianu les bases y fiches d'inscripción nel Premiu al Pueblu Exemplar d'Asturies, anque se recordó a la entidá "lo curtio d'esti pasu dau y la necesidá d'una mayor implicación de la FPA nel usu del asturianu".
Ente les nueses propuestes, ta la presencia del asturianu nos Premios Príncipe d'Asturies, mesmo na ceremonia, discursos, imaxe corporativa, como n'actividaes que se faen a lo llargo del añu, y que podríen venceyar a los premiaos con Asturies, con por exemplu, recitales lliterarios, publicación de la torna de la so obra al asturianu, etc.
La impresión d'Iniciativa pol Asturianu ye que la Fundación descarta usar l'asturianu na ceremonia y otres actividaes venceyaes a los Premios, sacante nel casu del Premiu al Pueblu Exemplar, polo que trabayamos en dar pasos nesi sen, como na rotulación de la placa que se coloca nel pueblu, nos discursos del Príncipe, etc.
Na busca d'un mayor compromisu solicitaremos aconceyar colos Príncipes d'Asturies na so próxima visita a la entrega de los Premios, col envís d'esplicar en primer persona la necesidá de que la institución use l'asturianu, como usa'l restu de les llingües nos territorios onde son propies.
