Yá ta disponible'l boletín informativu #10, con toles noticies d'Iniciativa pol Asturianu a lo llargo del mes d'agostu. Si tovía nun lu recibes, apúntate na parte d'abaxo de la nuesa páxina web pa recibilu cada mes.
Tercer programa de radio d'Iniciativa pol Asturianu nes ondes fechu na Universidá Asturiana de Branu (UABRA), en Cangas del Narcea, y onde tuvieron como convidaos la presidenta de l'Academia de la Llingua Asturiana, Ana Cano y el direutor de la UABRA Xosé Antón González Riaño, ente otros conteníos. El programa emítese en Radio Sele, Radio Ujo, AllerFM, Radio L.lena, Radio Kras, Radio Noreña, Radio Nava, Radio Alma (Bruseles)... y puede sentise tamién nes canales d'Iniciativa pol Asturianu en Ivoox y YouTube.
Representantes d'Iniciativa pol Asturianu van aconceyar esti xueves 30 d'agostu cola Asociación de Trabayadores de Normalización Llingüística, organización qu'axunta a profesionales de la política llingüística que trabayen en servicios de normalización nos conceyos n'Asturies.
Nes dos primeres selmanes d'agostu celebróse en Cangas del Narcea la Universidá Asturiana de Branu (UABRA), una esperiencia formativa organizada pola Academia de la Llingua Asturiana, la Universidá d’Uviéu y el Conceyu de Cangas. Dientro d’estos cursos, Iniciativa pol Asturianu organizó delles actividaes ente les que destacaron les charres informatives, el concursu de karaoke n'asturianu y el puestu informativu y de venta de llibros a preciu de crisis. El resultáu, nuevos asociaos a la organización y la recaldación de fondos pa la organización a lo llargo de los dolce díes de duración de los cursos.
Severino Suárez, profesor de la Universidá de Manchester, sofita a Iniciativa pol Asturianu dende esta ciudá británica y dientro del programa "Asturianos por el mundo" de la TPA. Suárez forma parte de la Rede Internacional d'Embaxadores pol Asturianu d'Iniciativa pol Asturianu.
Esti domingu 5 d'agostu, el voluntariáu de la organización tará presente pela primer vez nesta edición del festival xixonés que cuenta con desfiles, actuaciones musicales, deportes tradicionales y otres actividaes, especialmente nes primeres hores de la tarde.
Cangas del Narcea acueye estos díes la celebración de la Universidá Asturiana de Branu, una esperiencia formativa organizada pola Academia de la Llingua Asturiana, la Universidá d’Uviéu y el Conceyu de Cangas. Dientro d’estos cursos, Iniciativa pol Asturianu organiza delles actividaes. Una charra informativa sobre la organización, una folixa con con concursu de karaoke n’asturianu y la grabación con públicu del programa Iniciativa pol Asturianu nes ondes, tán ente lo programao pa estos díes en Cangas del Narcea.
La Xunta Direutiva d'Iniciativa pol Asturianu aconceyó de forma ordinaria en Xixón el pasáu sábadu 21 de xunetu. L'aconceyamientu sirvió pa facer repás de les actividaes y campañes entamaes a lo llargo de los meses pasaos. Aprobóse la celebración d'un conceyu cola Asociación de Trabayadores de Normalización Llingüística pal mes d'agostu, asina como la presencia en dellos actos y celebraciones, ente les que destaca la Universidá Asturiana de Branu de l'ALLA, onde se celebrarán delles actividaes.
La organización Iniciativa pol Asturianu llamenta fondamente la non aprobación de la propuesta d'Ordenanza pal Usu del Asturianu nel Conceyu de Noreña presentada pol grupu políticu Conceyu Abiertu. La propuesta recibió’l sofitu de Frente por la Izquierda y la organización que la presentaba, a los que felicitamos pol so compromisu na normalización del idioma en Noreña. Nun podemos, por embargu, más qu’amosar el nuesu descontentu con IDEAS y PSOE pola so decisión de votar en contra, que significa votar contra'l futuru del asturianu.
Iniciativa pol Asturianu quier felicitar públicamente a les Mocedaes Socialistes d'Asturies tres facese público que van incluyir la defensa de la oficialidá del asturianu ente los sos oxetivos como organización.