Iniciativa pol Asturianu organizó dos charres informatives a lo llargo del mes d'abril y coincidiendo con actos de presentación de la revista Formientu nos que collaborá la organización en Xixón y La Foz (Morcín). Nos actos espúnxose la situación del asturianu y diose a conocer el llabor de la organización. En dambos actos delles persones sumáronse como socios a la organización.
L'actu celebráu en Xixón tuvo llugar nel Club de Prensa de La Nueva España. Nel actu celebráu en La Foz, el pasáu 17 d'abril, un equipu de voluntariáu percorrió les cais de La Foz, con un repartu de propaganda ente comerciantes y ciudadanos. Amás, grabóse un programa especial d'Iniciativa pol Asturianu nes ondes.
Amás, nel Mercáu de La Flor en Ḷḷena, Iniciativa pol Asturianu organizó un puestu informativu y de venta de llibros a lo llargo de les dos xornaes d'esti eventu cultural y folixeru orgnizáu pola Xunta Cultural Rebelgu. Nel puestu grabáronse tamién delles entrevistes del programa de radio de la organización.
Estos actos formen parte de los esfuercios entamaos por Iniciativa pol Asturianu pa tar cada día más presente na cai y llevar a más asturianos y asturianes el mensaxe a favor de la llingua asturiana.
