Iniciativa pol Asturianu nes ondes, el programa d’esta organización, ufre un avance del so próximu programa, un entrevista especial colos actores María Cotiello y William Miller. Samuel Gradín, director del programa aprovecha la recién entrevista con Miller, nel programa +Gente, na primera de TVE, onde l’actor fizo una defensa del asturianu como llingua, dempués de les entrugues d’Anne Igartiburu sobre les llingües que fala, cuando Miller, pareya de Cotiello, esplicó que ta deprendiendo asturianu recordando a l’audiencia “que ye un idioma”.
El Conceyu Universitariu pol Asturianu (CUPA) tien abiertu’l plazu p’apuntase a la que yá ye la tercer edición de los Cursos d’Asturianu en Xixón, en collaboración cola Academia de la Llingua Asturiana y qu’esti añu va organizase de forma conxunta ente’l CUPA ya Iniciativa pol Asturianu. El plazu termina a finales d’esta selmana, el 10 de payares y yá tán apuntaos dellos alumnos de fuera d’Asturies, pa los que se va facilitar el siguimientu a distancia, gracies a les nueves tecnoloxíes. Ente los alumnos matriculaos, amás d’asturianos, xente de Méxicu, Uruguái, Suiza o Xapón.
Inaciu Galán y Vítor Suárez, miembros de la dirección d’Iniciativa pol Asturianu aconceyaron esti llunes 29 d’ochobre cola diputada de Foru Asturies, Carmen Sela Fernández, en sede parllamentaria. Asina mesmo, esti miércoles 31 aconceyaron tamién, siguiendo cola so rolda de contautos con les fuercies polítiques asturianes, col senador d’Izquierda Xunida d’Asturies Jesús Iglesias y la diputada del grupu parllamentariu d'IX na Xunta Xeneral, Emilia Vázquez. Los conceyos xiraron alredor de l’actualidá del idioma y nél la organización fizo delles propuestes a dambes formaciones polítiques.
Inaciu Galán y Vítor Suárez, miembros de la dirección d’Iniciativa pol Asturianu aconceyaron esti miércoles 31 d’ochobre na sede d’Izquierda Xunida d’Asturies cola diputada Emilia Vázquez, en representación del grupu parllamentariu d’IX, y el senador Jesús Iglesias. El conceyu celebráu n’Uviéu xiró alredor de l’actualidá del idioma y de les iniciatives que la organización política pueda presentar nun futuru.
Yá s'unvió a los socios y demás persones interesaes en conocer l'actualidá d'Iniciativa pol Asturianu, el so boletín informativu, qu'algama'l númberu 12, a poques selmanes de que'l proyectu cumpla un añu en marcha. Esti boletín informativu dixital ufre información completa de l'actividá de la organización a lo llargo del mes, asina como de dalgunes cuestiones futures.
Inaciu Galán y Vítor Suárez, miembros de la dirección d’Iniciativa pol Asturianu aconceyaron na mañana d’esti llunes 29 d’ochobre cola diputada de Foru Asturies, Carmen Sela Fernández, en sede parllamentaria. El conceyu celebráu n’Uviéu xiró alredor de l’actualidá del idioma y nél la organización fizo delles propuestes a la formación política, recibíes de forma positiva.
Cada mes, nel programa radiofónicu Iniciativa pol Asturianu nes ondes emítese una editorial sobre cuestiones llingüistiques. Reproducimos equí la del mes d'ochobre, sobre la falta d'usu del asturianu nos Premios Príncipe.
Iniciativa pol Asturianu entama esta selmana una rolda de conceyos con representantes de partíos políticos cola fin de tratar la situación actual de la llingua asturiana nel ámbitu autonómicu y estatal, asina como presentar propuestes d’actuación nesta cuestión en tolos ámbitos de xestión. Pa ello, representantes de la organización van aconceyar con tolos partíos representaos na Xunta Xeneral y nes cámares estatales (Senáu y Congresu los Diputaos) qu’asina lo quieran.
Yá pue sentise'l quintu programa de radio "Iniciativa pol Asturianu nes ondes", col que se difunden les actividaes de la organización y onde cada mes pueden sentise entrevistes con miembros d'Iniciativa pol Asturianu y persones d'otros colectivos pa conocer y aldericar alredor del asturianu y la so situación. Nesta ocasión, Samuel Gradín, director del programa, entrevista a María Díaz Suárez, maestra d'asturianu y Vocal d'Enseñu d'Iniciativa pol Asturianu.
Iniciativa pol Asturianu fizo llegar va delles selmanes a la “Fundación Príncipe de Asturias” una carta solicitando qu’use l’asturianu nes sos actividaes y mui especialmente nos Premios Príncipe. Destacaben que na so páxina web nun incluya al asturianu, cuando puede lleese hasta en 11 llingües distintes, y cuando la otra fundación del Príncipe, la Príncipe de Girona, inclúi una versión en catalán como páxina principal y un llogotipu billingüe en castellán y catalán.