L’editorial de xunetu: l’asturianu nes fiestes

Col branu Asturies llénase de fiestes perdayuri. Fiestes de prau, fiestes nes villes y ciudaes. Munches asociaciones de vecinos y otres entidaes públiques y privaes yá usen l’asturianu na cartelería o faciendo actividaes que tienen a la llingua asturiana como parte d’elles.

Ye importante implicase nes asociaciones de vecinos del pueblu o del barriu y participar y animar en positivo a los demás miembros a que l’asturianu tenga presencia nestos actos. Pueden cuntar con Iniciativa pol Asturianu pa echar un gabitu, asina como colos servicios de normalización nos conceyos, ente otres entidaes.

El nuesu compromisu tien de ser diariu y continuáu, un llabor que da resultaos adulces, pero que pasu ente pasu tien que llevanos a salvar l’asturianu y la cultura d’Asturies d’un desaniciu definitivu. Pa ello nun queda otra qu’implicase con compromisu llingüísticu, ensin complexos y de forma constructiva, en tolos ámbitos posibles.

Estos díes víemos como en Cangas del Narcea inauguraben el nuevu Parador del Monesteriu de Courias ensin facer casu a la reclamación de que respetaren la toponimia tradicional y oficial del llugar. Na construcción d’un futuru pal asturianu nun podemos garrar vacaciones, porque los que quieren acabar con ella nun descansen nunca.