La Sala Loreto de Colunga, y dientro d'una presentación de la revista de lliteratura Formientu, foi l'espaciu escoyíu pa una presentación nesti conceyu de la situación de la llingua asturiana y de l'actividá d'Iniciativa pol Asturianu.
Iniciativa pol Asturianu ufre la so collaboración con una charra dientro del dossier 2013 d'Ixuxú Asturies-Euskal Herria Elkartea. Esta iniciativa "Ixuxú elkartea" edita un dossier pa visibilizar aspectos sociales y culturales asturianos nel País Vascu.
Iniciativa pol Asturianu vien de solidarizase nestes caberes selmanes con dos situaciones perpreocupantes pal futuru de dos llingües: el guaraní y l'aragonés.
Miles de persones percorrieron la cai Uría d'Uviéu na Manifestación pola Oficialidá na que participó per segunda ocasión Iniciativa pol Asturianu. Dende la organización consideramos la convocatoria d'esti añu un pasu alantre pola bona participación, anque ye importante siguir trabayando pa implicar a más asturianes y asturianos nel trabayu pol futuru del idioma.
Esti vienres pasáu, 3 de mayu, XXXIV Día de les Lletres Asturianes, la presidenta de l'Academia de la Llingua Asturiana (ALLA), Ana María González Cano, destacó'l trabayu fechu por Iniciativa pol Asturianu dientro del so discursu añal, al que dio llectura na Xunta Estraordinaria de la institución, celebrada nel Teatru Campoamor d'Uviéu. La organización agradez esta reconocencia de la institución y felicita a tolos asociaos y collaboradores que faen posible'l llabor diariu d'Iniciativa pol Asturianu.
El Día de les Lletres Asturianes ye la fecha na que tradicionalmente se sumen fuercies pa reclamar la oficialidá del asturianu nes cais d'Asturies. Dende Iniciativa pol Asturianu, pretendemos tener presencia na cai esi día tan señaláu; ye por ello qu'asitiaremos un puestu informativu na plaza de La Escandalera d'Uviéu pa dar a conocer l'asociación, aprovechando pa facer dalguna aición complementaria (repartu de folletos, venta de material,...).
Iniciativa pol Asturianu va poner a disposición de toles persones interesaes una tirada llimitada de paragües col diseñu "Nun te mueyes col agua... muéyate pol asturianu" que van ponese a a la venta nel Día de les Lletres Asturiana y dientro del puestu que va ponese na Plaza La Escandalera, asina como na Manifestación pola oficialidá, al preciu de 10 euros pal públicu y 8 euros pa los socios de la organización.
Iniciativa pol Asturianu nes ondes, programa de radio d'esta organización, suma una emisora más a la so rede de difusión, que suma yá trece medios. Esti ye'l primeru que va llevar el programa hasta l'occidente d'Asturies. El programa va poder sentise tolos miércoles a les 23:30 y los sábados a les 14 hores, nel 107.5 de la FM.
Iniciativa pol Asturianu organizó dos charres informatives a lo llargo del mes d'abril y coincidiendo con actos de presentación de la revista Formientu nos que collaborá la organización en Xixón y La Foz (Morcín). Nos actos espúnxose la situación del asturianu y diose a conocer el llabor de la organización. En dambos actos delles persones sumáronse como socios a la organización.
Yá ta disponible'l boletín informativu númberu 18 de la organización, coles noticies del mes d'abril. Si entá nun te llega puedes lleelu equí o apuntate con namás introducir el to corréu nel estoyu al final d'esta páxina.