La Universidá Autónoma de Madrid va acoyer la celebración del I Congresu Internacional sobre la Llingua Asturiana: distintividá, identidá y oficialidá mientres los díes 27 y 28 d’abril. Esti alcuentru, coordináu pol profesor Avelino Corral en collaboración con Iniciativa pol Asturianu y el sofitu de l’Academia de la Llingua Asturiana, va valir pa facer un analís con diferentes ponencies, comunicaciones ya meses redondes de la situación actual del idioma.
Nes conferencies, que se van impartir n’asturianu, castellán ya inglés, van participar representantes de diferentes universidaes de tol mundu como Tennessee, Zurich, Varsovia, Oxford, Oklahoma y Washington y tamién de les d’Uviéu, Vigo, Autónoma de Madrid o Alcalá d’Henares asina como de la Universidá Nacional d’Educación a Distancia.
Dientro del alcuentru va aldericase de diverses cuestiones como les actitudes llingüístiques sobre l’asturianu, les perífrasis verbales na llingua asturiana, la música n’asturianu o un estudio sociollingüísticu nel sieglu XVI y XVII. Tamién va a haber espaciu pa la presentación de la obra ‘Volved las manos al bable’ d’Inaciu Galán, representante d’Iniciativa pol Asturianu nel congresu internacional.
Iniciativa pol Asturianu, entidá coorganizadora del congresu, pretende qu’esti se convierta nun espaciu pal alcuentru científicu acerca de la realidá social qu’arrodia a la llingua asturiana y se convierta nuna manera de siguir sumando perfiles del ámbitu universitariu al trabayu pol idioma, asina como facer llegar esa realidá a instituciones universitaries de tol mundu.
Programa Congresu
