Iniciativa pol Asturianu tuvo presente esta mañana en Llangréu con un puestu informativu con motivu de la IX Sestaferia Educativa, un alcuentru educativu pa la formación del profesoráu de Primaria, Secundaria y Bachilleratu de Llingua Asturiana y de gallego-asturianu. D’esti mou, la organización quixo treslladar el so sofitu a los docentes de l’asignatura, pol so llabor escomanáu na tresmisión de les nuestres llingües, y pa presentar a los y les participantes el trabayu que l’asociación vien desendolcando nel ámbitu educativu dende la so fundación hai yá diez años.
Nesi sen, el presidente d’Iniciativa pol Asturianu, Iván Llera, aprovechó pa treslladar a los y les profesionales de la enseñanza d’asturianu y gallego-asturianu l’esfuerciu de l’asociación, en diferentes ámbitos, pa consiguir la reconocencia de la especialidá docente de llingua asturiana. «Llograr esta reconocencia supondría un fitu perimportante pa la dignificación del asturianu y el gallego-asturianu y de l’asignatura, y valdría pa dar estabilidá a la materia y al propiu profesoráu».
Llera apuntó que “la reconocencia de la especialidá docente ye una demanda hestórica de la comunidá educativa asturiana y que tanto la Conseyería d’Educación, la Dirección Xeneral de Política Llingüística y el Ministeriu d’Educación tienen que buscar una igua definitiva pa esta llamentable situación. Ye’l momentu de finar con una inxusta desigualdá llaboral y dar l’estatus que merez a l’asignatura de Llingua Asturiana”.
El presidente d’Iniciativa pol Asturianu insistió en qu’esta decisión ye una cuestión de «voluntá política» y nun tien que tener vinculación cola oficialidá del idioma como munches vegaes s’argumenta pa la so non aprobación. La organización recuerda que la Conseyería de Cultura, Política Llingüística y Turismu dispón d’un informe qu’avala la creación de la especialidá docente ensin oficialidá cola mesma validez y efectos que les demás rames educatives. «Nun ye esplicable que siendo una cuestión que xeneró yá delles votaciones unánimes de la Xunta Xeneral, y tando nel programa de cásique tolos partíos, nun se diera yá solución a esti problema que lleva xenerando dificultaes dende va más de trenta años”.
P’acabar, el presidente d’Iniciativa pol Asturianu dixo que “güei tamos en La Felguera pa treslladar l’arguyu del conxuntu de la nuesa organización pol trabayu que faen caldía los y les profesores d’asturianu que con tanta ilusión y tantu puxu tan llogrando salvar y enseñar l’idioma frente a tantes dificultaes. Güei queremos da-yos les gracies pol so trabayu”.
