Iniciativa pol Asturianu pide a los grupos parllamentarios qu’alcuerden una dirección de RTPA qu’apueste definitivamente pola llingua asturiana y que trabaye pa que los medios de comunicación públicos se conviertan d’una vegada por toes nun axente principal de normalización llingüística. Pa ello ye necesario poner al frente a persones comprometíes cola recuperación llingüística que, amás, cuenten colos instrumentos afayadizos, ente ellos un departamentu de conteníos n’asturianu que, con rangu de dirección, s’encargue de potenciar les emisiones en llingua asturiana, garantizando la so calidá en terminos tanto de normativización como de normalización.

Los grupos políticos han entender que ye imposible salvar una llingua como l’asturiana, afectada por un evidente procesu de minorización, ensin unos medios de comunicación comprometíos con ello. Nesi sen, nun ye serio caltener la situación actual, na que la RTPA namás ta emitiendo el 10 por cientu de la programación -2,4 hores al día-, lo que representa una cantidá mui ruina pa lo que s’espera de l’único medio comunicación que, pol so calter públicu, ta en condiciones de facelo.

Nestes cifres inclúense, amás, programes que difícilmente puen considerase como ellaboraos en llingua asturiana y repeticiones n’hores que nun contribuyen a la tresmisión xeneracional del idioma, que ye lo que se busca. Falta, poro, amás de voluntá, una planificación seria y eficaz. La mayor parte d’estos conteníos, amás, vienen financiaos o pola Conseyería de Cultura, que, puntualmente, tuvo que facer un importante esfuerciu p’ayudar a un sector audivisual afectáu pola pandemia, o pola publicidá y el patrociniu de la iniciativa privada.

RTPA, poro, cada vegada cumple menos col mandáu que figura na so propia llei de creación de “promover l’asturianu” y, como muncho, toléralu si-y lo dan de baldre. Nesi sen, refugamos escuses recientes como l’ausencia d’un mandato-marcu o d’un contratu-programa que fixe porcentaxes, midida pola que nun s’apuesta, por ciertu, en nenguna otra de les radiotelevisiones qu’emiten nuna llingua propia. Arriendes d’ello, de nengún d’estos documentos dispón anguaño la radiotelevisión gallega y la so contribución al procesu de recuperación llingüística na comunidá vecina ye evidente.

Ye, poro, una cuestión de voluntá de la propia dirección de RTPA, qu’ha ser consciente del momentu hestóricu que vivimos, nel que pela primer vegada emprimamos el camín de la recuperación llingüística d’una manera seria y al altor de lo que la nuesa sociedá demanda.