De les 37 actividaes previstes pa esti trimestre, namás 3 cunten con pases nesta llingua
Iniciativa pol Asturianu reclama al muséu un incrementu de la presencia d’actividaes nes que tea presente la llingua asturiana
Iniciativa pol Asturianu llamenta la mínima presencia de la llingua asturiana ente les actividaes programaes pa esta primavera nel Xardín Botánicu Atlánticu de Xixón. L’espaciu tien prevista la celebración de 37 actividaes pa esti trimestre. La totalidá d’elles son en castellán sacante tres actividaes pa la reciella agrupaes baxo’l títulu Cuentos de Idus que se van celebrar los díes 15 y 16 d’abril (‘El viaje de Poli y Meli’), el 15 de mayu (‘La bruja Maruxa’) y el 12 de xunu (‘Deva la mariposa’) con seis pases caldía, siendo la metá en castellán y la otra metá n’asturianu.
D’esta manera, namás una de cada diez actividaes programaes pa esti trimestre nel Xardín Botánicu xixonés tienen presencia de la llingua asturiana frente a una mayoría en castellán. Amás, magar que la programación del Xardín Botánicu pa esti trimestre foi presentada’l pasáu 21 de marzu, el folletu informativu col programa d’actividaes pa esti periodu nin siquiera ta disponible n’asturianu.
La organización reclama al Conceyu de Xixón un incrementu de la presencia d’actividaes n’asturianu nel Xardín Botánicu en cumplimientu del Plan de Normalización Llingüística pal periodu 2020-2023. El documentu, aprobáu pol Plenu municipal n’agostu de 2020, recueye nel puntu 56 el compromisu pa «asegurar la esistencia d’una ufierta cultural n’asturianu (musical, teatral, cinematográfica, de cómic, etc) pal públicu infantil y xuvenil aprovechando la programación y los eventos culturales y d’ociu organizaos pol Conceyu», como ye’l casu del muséu vexetal.
