Dempués de conocer la intención del equipu rectoral de la Universidá d’Uviéu de dexar d’utilizar la llingua asturiana na institución académica,  Iniciativa pol Asturianu denuncia qu’esti camín d’abandonar l’usu del idioma yá entamó va tiempu, dende la llegada del nuevu equipu rectoral. Asina pudo comprobase, ente otres ocasiones, de la que l’idioma desapaeció de la imaxe corporativa de la Universidá d’Uviéu, o de les actividaes empobinaes nel espaciu de la Universidá na Feria de Muestres, cuestiones que reclamamos en diferentes conceyos celebraos col equipu del rector actual.

Nesi sen, la organización recuerda que nun hai nenguna vulneración de nenguna llei, nin estatal nin autonómica, pol usu del asturianu, sinón tolo contrario. Los propios Estatutos de la Universidá d’Uviéu recueyen nel so artículu 6 la necesidá de trabayar dende la institución na normalización del idioma, necesidá que tamién contempla mesmo la llexislación autonómica d’alcuerdu colo qu’establez la Llei d’Usu.

Iniciativa pol Asturianu reclama al equipu rectoral a facer una reflexón y camudar esa postura pa col asturianu y dar al idioma la relevancia y respetu que merez nuna institución como la Universidá d’Uviéu, recuperando la imaxe col usu del asturianu que s’implementó dende l’equipu rectoral anterior. Ye inalmisible que se dean pasos atrás cuando la comunidá universitaria recibió con total normalidá y aceptación l’usu del asturianu nos últimos años. Vamos solicitar un nuevu conceyu col Rector pa buscar soluciones a esta situación de marcha atrás nel usu del asturianu.

Artículos venceyaosMás del autor