Iniciativa pol Asturianu celebró güei l’anuncia del Ministeriu d’Educación sobre la creación de la especialidá docente de Llingua Asturiana. La organización de reivindicación llingüística considera qu’esta decisión supón un pasu alantre pa la enseñanza del idioma, al meyorar la calidá educativa, reconocer el trabayu del profesoráu y dignificar la presencia de les llingües propies nel sistema educativu.
La organización tresllada amás la so felicitación a l’Asociación de Docentes d’Asturianu y Eonaviegu (ADAE) por caltener y reforzar a lo llargo de toos estos años la movilización en defensa d’esta reivindicación histórica, asina como de los sindicatos. La entidá tamién quiso valorar la xestión del Gobiernu del Principáu d’Asturies ente’l Ministeriu d’Educación pa llograr la modificación de los Reales Decretos que permitirán la creación de les Especialidaes Docentes d’Asturianu y d’Eonaviego.
Nesi sentíu, la presidenta d’Iniciativa pol Asturianu, Arantza Margolles, afirmó que «esta ye la prueba de que la movilización, la denuncia constante y la xuntura de fuercies son el camín pa siguir conquistando nuevos espacios pa la llingua asturiana».
Margolles destacó amás que «esta decisión ye un ésitu d’Asturies y del profesoráu d’asturianu; de toles persones que participaron nel enzarru nel colexu de Cabueñes, de tolos que fueron a movilizase a Madrid y de toles persones que se sumaron nes movilizaciones convocaes por ADAE. Pero tamién ye una victoria de les families que matriculen a los sos fíos y fíes na asignatura, del alumnáu y, en definitiva, de tola llingua asturiana».
La presidenta de la organización sorrayó, sicasí, qu’entá queden importantes avances por algamar nel ámbitu educativu. «Reconocemos, valoramos y celebramos esti pasu, pero tamién queremos siguir avanzando pa garantizar la igualdá y la dignidá del asturianu n’otros ámbitos, como les Escueles Oficiales d’Idiomes o la Formación Profesional».
Na mesma llinia, añadió que «esta ye la demostración de que, frente al pesimismu y a quien sostién que ‘nun se pue algamar nada’, la única batalla que se pierde ye la que nun se llucha. La movilización de la sociedá da resultaos y esti ye un exemplu evidente».
Arantza Margolles quiso tamién reconocer «l’enorme esfuerciu, compromisu ya ilusión» de los centenares de docentes que, durante más 45 años, impartieron la asignatura d’asturianu pese a les dificultaes, pilancos y desprecios.
«L’aprobación de la especialidá docente tien d’entendese tamién como un homenaxe a toles profesores y profesores que dedicaron y dediquen la so vida a la enseñanza de les llingües propeies», señaló.
Pa finar, la presidenta recordó que «Iniciativa pol Asturianu siempres pon en marcha una votación popular pa escoyer la meyor noticia del añu. Probablemente yá tengamos la d’esti 2026, pero eso nun significa que debamos conformanos. La Conseyería d’Educación tien de siguir avanzando na incorporación del asturianu a toles etapes del sistema educativu, recuperar les campañes de matriculación y avanzar escontra un modelu de voluntariedá real que sustituya l’actual optatividá. Agradecemos al Ministeriu d’Educación esti importante pasu, pero’l camín pa llograr la plena la igualdá llingüística continúa».
