Iniciativa pol Asturianu recrimina al Conceyu de Xixón l’ausencia d’un usu dignu del asturianu na placa d’homenaxe a Ígor Medio, músicu de Felpeyu y dibuxante, instalada nel barriu d’El Natahoyo.
La organización considera mui triste suprimir l’asturianu nun espaciu de memoria dedicáu a una persona que fixo de la llingua asturiana una ferramienta d’espresión musical y de creación artística, asina como de reivindicación. Ígor Medio foi una figura fundamental na defensa del asturianu y de la so oficialidá, polo que nun resulta de recibu un homenaxe nel que s’arrequexe precisamente l’idioma qu’amaba y defendía.
Iniciativa pol Asturianu critica amás que’l protocolu del Conceyu utilizara únicamente la toponimia deturpada na invitación oficial al actu d’inauguración, prescindiendo de la forma oficial Xixón, aprobada conforme a la llexislación vixente, xusto cuando se cumplen 20 años de la oficialización de la toponimia tradicional del conceyu y el gobiernu municipal quier entamar una serie d’actos conmemorativos.
Nesi sentíu, la presidenta de l’asociación, Arantza Margolles, reclamó que “más que organizar actos para recordar los 20 años de la oficialización de la toponimia de Xixón, taría bien cumplir escrupulosamente esi decretu, facelo en tolos ámbitos y de forma continua”.
La organización considera que convidar a un actu d’homenaxe con un documentu qu’incumple la toponimia oficial y instalar una placa namás en castellán dedicada a un referente del asturianismu evidencien una falta de sensibilidá y una falta de respetu a la persona reconocida y a la llingua asturiana.
L’asociación reclama al Conceyu de Xixón que rectifique esta situación incorporando una versión íntegra n’asturianu na placa conmemorativa y garantizando que, de cara al futuru, la comunicación institucional respete tanto la toponimia oficial como la presencia del idioma nos actos públicos, amás de demostrar una mayor sensibilidá y cuidu na organización d’esti tipu d’homenaxes.
