Prácticamente al mesmu tiempu que la Radiotelevisión del Principáu d’Asturies (RTPA) soplaba les veles del so venti aniversariu, la sede de la soberanía asturiana, la Xunta Xeneral del Principáu d’Asturies, escoyía a la nueva directora que va tomar les riendes de la corporación nos próximos años: la periodista Azahara Cañedo, a quien aprovecho pa felicitar pola so elección.
A lo llargo d’estes dos décades, la nuesa cadena pública foi medrando en conteníos, ufierta televisiva y diversidá de programes. Por desgracia, esi crecimientu nun tuvo un reflexu equivalente na presencia y programación de conteníos nes nueses llingües propies: l’asturianu y l’eonaviegu.
Ye conveniente recordar que la RTPA nació con una presencia del asturianu del 0%, una realidá que choca frontalmente colo previsto na Llei d’Usu. Nel so artículu 13, dedicáu a la difusión, la norma establez claramente que se velará pola presencia de la llingua propia nos medios públicos.
Dende Iniciativa pol Asturianu insistimos habitualmente nuna idea fundamental: la llingua propia ye ún de los elementos que más xustifiquen la esistencia d’una televisión autonómica. Del mesmu mou, una televisión pública constitúi una ferramienta bien poderosa y afayadiza de normalización social pa cualesquier idioma.
Sicasí, los sucesivos responsables del ente nun aprovecharon dafechu esi potencial en defensa del nuesu patrimoniu llingüísticu. Dende los sos entamos, l’asturianu foi utilizáu con frecuencia de manera folclórica o humorística. Al entamu cuntábemos con programes como _Terapia de grupo_, pasaron los años y llegamos a la realidá actual: malpenes cuatro minutos diarios dedicaos a un resume informativu n’asturianu al final de los informativos.
Ye de xusticia reconocer que se fixeron programes interesantes y que se produxeron avances. Sicasí, estos fueron claramente insuficientes pa lo que precisen les llingües d’Asturies.
Como dicía’l célebre tangu interpretáu por Carlos Gardel, podría paecer que venti años nun ye nada. Pero sí podríen ser muncho si l’asturianu desempeñara un papel central nel ente públicu. Asina y too, nun hai nada perdío nin llegamos tarde. El nomamientu d’Azahara Cañedo abre una ventana d’oportunidá pa que la llingua asturiana ocupe ensin complexos, ensin conflictos y con absoluta normalidá’l llugar que-y correspuende na radio y televisión públiques asturianes.
Ye’l momentu d’impulsar una programación prestosa n’asturianu pa los más pequeños. Apostar por conteníos de calidá na llingua propia resulta fundamental pa garantizar la tresmisión xeneracional del idioma. Amás, estos conteníos podríen convertise en recursos educativos pa les aules y nuna ferramienta eficaz pa fidelizar a les nueves xeneraciones d’espectadores.
Dignificar l’usu del asturianu na RTPA pasa por xenerar conteníos pa toles edaes y demostrar que l’idioma nun s’utiliza únicamente pa falar de sí mesmu na Selmana de les Lletres. L’asturianu tien de tar presente en programes deportivos, d’investigación, de serviciu públicu, nos informativos y en cualesquier otru formatu o temática.
Nun fai falta buscar exemplos alloñaos nin modelos televisivos estraños. Resulta suficiente con cruciar el puente de Los Santos y prender la televisión autonómica en Ribadeo. Comprobaremos entós que ye perfectamente posible desarrollar una televisión del terrritoriu en llingua propia capaz d’ufiertar conteníos pa tolos gustos, públicos y edaes.
Por desgracia, tamién hai que recordar el _handicap_ que supón la falta d’oficialidá pal asturianu y l’eonaviegu. Esa falta de reconocimientu impide acceder a determinaes ayudes estatales destinaes a la producción de conteníos propios que podríen alimentar la programación del ente públicu. Tamién amenorga les posibilidaes de financiación pal doblaxe audiovisual, cola consiguiente perda d’actividá económica pal sector empresarial venceyáu a la llingua.
Nun debemos quedar únicamente colo negativo. Miremos al futuru con ilusión y con voluntá de trabayu conxuntu pa fortalecer la presencia del asturianu nel nuesu canal públicu, tal y como reclama una parte importante de la sociedá asturiana.
Nesta nueva etapa qu’agora entama p’Azahara Cañedo, llegó’l momentu de la valentía y de convertir l’asturianu nunu de los exes fundamentales de la televisión pública asturiana, porque tenemos los profesionales, tenemos la capacidá y tenemos tol futuru per delantre.
Muncho ánimu, Azahara, con esta nueva responsabilidá que garres. Que l’asturianu y l’eonaivegu tengan contigo’l llugar que merecen nel ente.
