Bonos díes a toos y a toes,
Dende Iniciativa pol Asturianu quiero, en primer llugar, agradecer la cellebración d’esti III Congresu Internacional de la Llingua Asturiana, un espaciu que dende la so primer edición vien consolidándose como puntu d’alcuentru pa la investigación, la divulgación y el debate alredor del nuesu idioma, dalgo tan importante pal caltenimientu del mesmu especialmente en tiempos duros como los que vivimos, nuna situación ensin oficialidá y sostenimientu del mesmu, y de prevención ante los peores que van venir.
Pa nosotros y nosotres ye especialmente importante tar equí (anque seya telemáticamente, como ye’l mi casu), porque Iniciativa pol Asturianu, como sabéis, vien participando na organización d’esti congresu dende’l so entamu, collaborando pa que seya un foru útil y abiertu a la comunidá científica, al movimientu asociativu y a la sociedá en xeneral, pa Asturies y non por ello, necesariamente, dende Asturies.
Esti alcuentru, cellebráu con periodicidá bianual,ñació cola vocación de xenerar conocimientu y de dar visibilidá a la realidá del asturianu dende una perspectiva académica ya internacional, xuntando investigadores de distintes universidaes y ámbitos d’estudiu. Dende la nuesa organización, fundada col oxetu de promover la normalización social de la llingua y la defensa de los drechos llingüísticos de la ciudadanía, entendemos que espacios como esti son fundamentales pa siguir avanzando.
El trabayu científicu, l’análisis rigurosu y la reflexón compartida ayuden a fortalecer la presencia del asturianu y a asitiar el debate nel llugar que-y correspuende, con datos, con conocimientu y con visión de futuru. Amás, esti congresu permite tender pontes ente l’academia y la sociedá, y contribúi a que la llingua asturiana seya estudiada, valorada y reconocida nel contestu internacional.
Queremos tamién poner en valor el compromisu de toles persones que participen, que con les sos aportaciones amplíen el campu de conocimientu y abren nueves víes de trabayu pa los años vinientes. Dende Iniciativa pol Asturianu vamos siguir impulsando acciones que favorezan la presencia del idioma en tolos ámbitos, collaborando con instituciones, colectivos y persones que compartan esti enfotu.
Esperamos que estes xornaes sían un espaciu fructíferu de diálogu, aprendizaxe y intercambiu d’idees. ¡A por ello!
Munches gracies.
