Amigues y amigos de L’Abadía Cenero:
Ye pa min un honor ser pregoneru d’estes fiestes les de la parroquia más grande Xixón, lo que siendo xixoneses, y polo tanto grandones, tien que facevos sentir mui arguyosos. Siguiendo esta tradición grandona, d’escalerones, cerones, molinones y otros llugares y oxetos a los que-yos damos aumentativos, non siempres con méritu real, bien podíemos llamar a esta parroquia, la parroquiona. Pero cuidáu, non solo pol tamañu, sinón poles munches coses de valor que podemos atopar nella y na so hestoria.
Tolos xixoneses tamos arguyosos del patrimoniu cultural que conserváis en L’Abadía Cenero. Ye una parroquia que si vienes a Xixón de turismu nun pues dexar de visitar.
¿Cómo marchar d’equí ensin ver los restos de la villa romana de Veranes?, ¿o cómo ser xixonés y nun venir a conocer, en Trubia, les torres de los Álvarez de les Asturies y la de los Valdés, el famosu Turruxón? Por nun falar d’esta ilesia con tanta hestoria a la qu’acompaña’l guapu texu de Cenero, que vio pasar los sieglos y los cambios d’esta collación xixonesa.
Un texu del que nos falaba Juan Valentín Suárez Muñiz, «el fíu de Josefa Cantera», nel añu 1975:
Sentáu debaxu’l texu escribí nun papelucu esti llargu pensamientu:
Yo recuerdo que mio güelu Por so padre s’enteró Que’l texu de l’Abadía Nun supo quién lu plantó.
Y morrieron cuatro güelos, Pero… sigo vivu yo.
Pensélo munches veces
Y agora quiero que me digan Pa dexame satisfechu:
¿Cuántos años tien el Texu?
Porque yo perdí la cuenta y sé que pasa de cien
Pue que de cientu ochenta.
Esti texu tan guapín
Que ta al llau de la caleya Creció con agua bendita De les piles de la ilesia.
Recordaba entós el fíu de Josefa Cantera, les sos vivencies xunto al texu, el sabor de les cereces de la infancia:
[…]
Cuando salimos de misa Vamos a esti redondel, Que ta debaxu del Texu, Con goxines de cereces Apiñaes y forradines Con aquel verde felechu.
Yo gastaba los domingos Una perronina entera Naquelles riques cereces Que vendía Pepa Prau
Y María la Paxarera.
Hoi si les queréis comer Hai que dir a Fontaciera De Pinzales a Florida Cuéyense ensin escalera.
Esgalitando p’arriba
Yá nunca podréis llograr Comer aquelles cereces. (Envueltines con cariñu) En fueyines de figar.
[…]
Y remataba Juan Valentín, en defensa encesa del texu, con estos versos, que siguen vixentes:
A todos los que vivís En L’Abadía Cenero
Y veis ya con cariño
A este eterno compañero
Os pido yo por favor
Que soy también de Cenero:
mirar por esa reliquia
Que va de abuelo en abuelo.
¡Dexái’l texu plantáu Buscando l’azul del cielu!
Apaecieron esto versos tan sentíos, testimoniu d’una época, restolando nel mio archivu estos díes, a la gueta de porfolios antiguos de fiestes que conservo con cuidáu, como vosotroso el patrimoniu, y ente los que sabía que tenía dellos de les Fiestes de L’Abadía Cenero, de los años setenta, con más de mediu sieglu yá sobre les páxines.
Estos porfolios de les fiestes de L’Abadía teníen siempres un importante espaciu pa les publicaciones n’asturianu, porque esta parroquinona cuida tamién el so patrimoniu llingüísticu, y l’asturianu siéntese con puxu nes caleyes y nes caseríes. Pero había tamién espaciu pa les noticies qu’esmolecíen a los vecinos y les vecines, pa les sos reivindicaciones
Nel porfoliu de les fiestes del añu 1974 reivindicabáis a L’Abadía Cenero como pionera del fútbol femenín. Dende l’añu 1960 con esi partíu que la crónica de 1974 reivindicaba:
Ya sabemos todos que el fútbol es el fenómeno social de la época, la manifestación deportiva que mayor número de adeptos cuenta en el mundo. Un fenómeno en el que la mujer también ha deseado ser partícipe, porque nuestras féminas, el bello sexo, que día a día viene luchando por su independencia social, por una igualdad de derechos con el hombre, no se ha conformado con una equiparación meramente civil -ya tenemos hasta una mujer fiscal, sino que ha pugnado asimismo, por una equiparación deportiva. Y naturalmente el fútbol ha sido uno de los deportes que ha escogido y en el que día a día van ensanchando su campo de acción.
Pues bien, y esto es justo reconocerlo aquí, Cenero ha sido una de las zonas «pioneras» del fútbol femenino mundial, con sus tradicionales encuentros entre «solteras» у «casadas». Puede que empezaran por mera diversión, como sin darse cuenta de su significado. Pero hoy, cuando el algún país como Italia, arrastra masas tras de sí e incluso conoce de fichajes con cifras económicas importantes, conviene recordarles que aquí, en Asturias, en Gijón, en una de sus parroquias más hermosas e históricas, en Cenero, llevan ya unos cuantos años organizando un singular partido de fútbol femenino, que enfrenta a esos dos equipos de «casadas» y «solteras y que ha creado afición, más tarde extendida a diferentes Grupos de Empresa.
Por eso, ahora, cuando todavía en España el fútbol femenino no ha sido admitido dentro del campo federativo cuestión que más tarde o más temprano habrá de llegar, pues ninguna razón de peso abona la postura contraria y ahí tenemos bellas féminas lanzando disco, peso, etc.-. Cenero es zona «pionera» del balompié femenino nacional y así habrá que reconocérselo y agradecérselo algún día, oficialmente, en las mejores páginas de la Historia del Fútbol Español.
Una reivindicación feminista que sigue mui vixente, anque claro, 52 años más tarde,
¡menos mal!, los pasos alantre daos son más que significativos nel campu futbolísticu tamién. Esta parroquia nun tien namás piedres y árboles de les que se sentise arguyosos y arguyoses, sinón tamién persones, con bones idees y valores positivos pioneros, como’l d’esti exemplu.
Cuando me meto pelos archivos tengo munchu peligru y unu nun dexa d’atopar coses interesantes. Va cincuenta años, en 1976, L’Abadía Cenero manifestábase con puxu contra’l vertederu que’l conceyu de Xixón empecipió a facer, como se facíen les coses entós, ensin permisos, nin controles medioambientales, nin cuntar colos vecinos… en La Pica Corros, que resuena yá a nome de llugar míticu.
Aquella llucha de los vecinos y vecines de L’Abadía Cenero reflexóla entós nes páxines del porfoliu de les fiestes y en forma de versos reivindicativos, Alfredo González Álvarez, de Pinzales:
Pleitu col Municipiu
Fíxose un atropeyu con un pueblu, que si en dalgo pecó, fue de decente; llenaron L’Abadía de basura, sin escuchar les quexes de la xente. Cola ayuda del Cristo, ganaremos el pleitu entabláu col municipiu, pa que nun nos quede la Parroquia, fecha un verdaderu desperdiciu. Nun soi mui rencorosu, pues quería que gaste’l municipiu na botica, les perres qu’agora gasta L’Abadía, en querer descastriar la porquería, que nos metió un municipiu inconsciente, cual si quisiera rise d’esta xente.
La manifestación zarrando’l pasu de los camiones a aquel vertederu pirata impresionó a la xente y a los medios de comunicación, que recoyíen como quinientos vecinos y vecines de tolos pueblos d’esta parroquia tuvieron al fríu de la nueche y prendiendo fogueres pa calecer, parando aquel atropellu, en plenes fiestes navidiegues.
Cortando’l pasu, echando aceite nes carreteres pa que los caminones nun pasaren, llucha coles instituciones, qu’encabezaba Manuel Sirgo, que dimitió como alcalde pedanéu pa ponese al frente entós de la recién creada asociación de vecinos. Yeren tiempos de transición de la dictadura a la democracia. Dos años duró aquel conflictu, que llevó a llograr la dimisión del últimu alcalde franquista de Xixón, llogróse l’ésitu de la fin d’aquel estropiciu pa la parroquia. Parroquiona tamién pola so llucha valiente y en defensa del mediu ambiente y el paisaxe.
Y nes lluches tuvo tamién munchos años, equí y en toa Asturies Xesús Cañedo. Nun puedo venir a esta guapa parroquia de L’Abadía Cenero, nesti 2026, y nun facer alcordanza d’un vecín que nos dexaba col fin d’añu y col que tuvi la suerte, como munchos de vosotros y vosotres, de compartir trabayu militante. El so llabor en defensa d’Asturies y de la cultura asturiana llevónos a compartir espacios y l’últimu d’ellos, hasta la fin de los sos díes, foi como compañeros n’Iniciativa pol Asturianu.
Güei los compañeros y compañeres de la organización de reivindicación llingüística, queríemos aprovechar que tamos na so casa, na so querida parroquia, pola que tanto trabayó tamién, pa entregar a la familia un pequeñu reconocimientu por tanto fecho pola cultura d’Asturies y pola llingua asturiana na so vida.
Conociendo como conozo agora meyor la vuesa tradición reivindicativa, el vuesu amor por cuidar la cultura y el patrimoniu, nun m’estraña l’espíritu militante y combativu de Chus. Pido un aplausu na alcordanza y homenaxe del vuesu vecín, del amigu que yera Xesús Cañedo.
Quiero acabar esti pregón faciendo mención y tamién homenaxe a les persones que conformen la comisión de fiestes, a les que collaboraron pa qu’estes romeríes, estes fiestes de prau, sigan esistiendo, porque de dalguna manera son la forma de siguir creando comunidá, de qu’un pueblu siga siendo un pueblu, y non solo una urbanización de cases nes que naide fala con naide, nes que naide ayuda a un vecín, nes que lo mesmo da la comunidá.
Por eso mantener les fiestes nun ye namás un entretenimientu pal pueblu, que tamién, ye caltener una forma de vida, un espaciu pa conocese, pa charrar, collaborar, una forma de siguir trabayando n’andecha o faciendo sestaferies. Una forma de caltener la cultura, el folclor, l’asturianu, que tanta falta fai que cuidemos, que falemos ente nosotros, y colos fíos, colos nietos, que tresmitamos y enseñemos pa que se siga falando, que nos mandemos d’él tamién pa dar la misa y pa rezar, pa les fiestes y pa los momentos serios.
Anímovos a que queramos a la nuesa llingua asturiana, que sigue siendo y sedrá la forma de ver el mundu y d’espresalu que tenemos y que tanto nos presta a los asturianos. Porque diba mancanos muncho perdela. Nun la dexemos morrer, como fixo la familia de la que vos falo nel poema, unu mio nesti casu, col que voi despidime esta tarde, pa dexavos esfrutar de la fiesta.
Un fardeláu de pallabres
En pueblu dexaron
la casa, les madreñes, les vaques, el castañéu.
En pueblu dexaron les pites, la herba,
la fesoria, el golor a cuchu.
En pueblu dexaron una forma de vida les sos tradiciones y un fardeláu
de pallabres
que yá nun-yos facíen falta.
Criaron los fíos fixeron la vida
con too aquello enterrao na memoria’l pasáu.
A la casa, aburrida, solitaria foi comiéndola l’escayu.
Un día tornaron colo fíos al pueblu. La casa nun taba,
les pallabres lleváreles l’aire cuantayá.
Y los fíos nun sabíen pone-y nome
a les coses d’aquel mundu
nel que yeren más qu’estranxeros, estraterrestres.
En pueblu dexaren la vida, dexaren l’alma.
Al decatase, enllenólos la tristura pero yá nada podía llevantar aquelles ruines
d’una vida abandonada.
Nun dexemos que la nuesa cultura seya ruines nunca.
¡Puxa L’Abadía Cenero, la so xente y la so romería!
¡Puxa Asturies!
Munches gracies.
