Iniciativa pol Asturianu participó na mañana d’esti sábadu na manifestación pola oficialidá celebrada n’Uviéu, onde miles de persones volvieron salir a la cai pa reclamar el reconocimientu oficial de la llingua asturiana y del eonaviegu nel Estatutu d’Autonomía.
L’asociación asistió cola so pancartona de la oficialidá con mensaxe ‘La sociedá asturiana axúntase pola oficialidá: el camín de consensu consitucional’.
La presidenta d’Iniciativa pol Asturianu, Arantza Margolles, afirmó que “ye’l momentu de siguir trabayando ensin descansu pa consolidar un consensu ampliu alredor de la oficialidá. Y al empar, de llograr nuevos avances en materia llingüística n’otros ámbitos como la educación o la radiotelevisión pública asturiana. Hai una reivindicación histórica en defensa de la Especialidá Docente y un cambéu na dirección de la RTPA. Ye’l momentu d’aplicar la mayoría parllamentaria de la Xunta Xeneral que defende la oficialidá pal lograr pasos alantre”.
La representante de la organización de reivindicación llingüística aprovechó la movilización pa recordar que “el consensu consitucional ye’l camín de diálogu, alcuerdu y responsabilidá democrática que necesita Asturies pa facer posible una reforma estatutaria que garantice los derechos llingüísticos de tola ciudadanía”.
Margolles consideró tamién que “la oficialidá nun ye una cuestión partidista nin una imposición. Ye una ferramienta democrática pa protexer el patrimoniu cultural y garantizar drechos. Por eso ye fundamental siguir tendiendo pontes y fortaleciendo los espacios de consensu”, señalen dende la entidá.
Iniciativa pol Asturianu recuerda que cada vegada son más les persones, colectivos, sindicatos, empreses y entidaes sociales que sofiten la oficialidá como un pasu natural y necesariu pal futuru d’Asturies. La organización destaca amás que la Constitución Española y el marcu xurídicu actual permiten perfectamente’l reconocimientu oficial de les llingües propies, tal y como asocede n’otres comunidaes del Estáu con llingua propia.
Por ello, Iniciativa pol Asturianu fai un llamamientu a los grupos políticos a actuar con visión democática y constitucional, responsabilidá institucional y voluntá d’alcuerdu pa culminar un procesu llargamente demandáu pola sociedá asturiana.
“Asturies necesita más consensu, más valentía democrática y más compromisu cola so cultura y cola so identidá. La oficialidá ye futuru y llibertá”, concluyó Margolles.
