La organización va tar presentándose a los asturianos en Madrid esti xueves 4 de xunetu, a partir de les 19 hores. Sedrá nel Centru Asturianu de Madrid, asitiáu na cai Farmacia, 2, a pocos metros de la Gran Vía, nel centru de la ciudá. Nel actu va presentase tamién la revista Formientu, cola presencia d'autores mozos y de Xosé Bolado, escritor y miembru de l'Academia de la Llingua Asturiana.
Iniciativa pol Asturianu va tener puestu informativu y de venta de productos na Fiesta de la Oficialidá de Bimenes, como na edición anterior. Sedrá'l próximu sábadu, 6 de xunetu, a lo llargo de tola xornada. Con esta presencia Iniciativa pol Asturianu quier siguir dándose a conocer ente los habitantes del conceyu de Bimenes, asina como sofitar una fiesta que pasa per malos momentos económicos.
Iniciativa pol Asturianu tuvo esti sábadu 29 de xunu presente con puestu informativu y de venta de productos na xornada organizada pol Colectivo Interferencias pol primer aniversariu del Proyeutu Ástura, nel Muséu del Pueblu d'Asturies, en Xixón.
Yá ta disponible un mes más el boletín informativu dixital d'Iniciativa pol Asturianu con toles noticies y actividaes de la organización a la lo llargo del mes de xunu, y con anuncia d'actividaes pa los próximos díes.
L'asociación musicocultural Pepe Bocanegra de Valles (Piloña) cunta yá con versión n'asturianu del so blogue informativu, onde reseñen los sos eventos. La idea surdió d'un miembru de la xunta directiva de l'asociación y cunta col sofitu d'un miembru d'Iniciativa pol Asturianu nesti conceyu del oriente pal asesoramientu llingüísticu.
La organización Iniciativa pol Asturianu va tener puestu informativu na xornada organizada pol Colectivo Interferencias nel Muséu del Pueblu d'Asturies, en Xixón esti sábadu 29 de xunu de magar les cinco la tarde. Nel puestu van poder mercase llibros y otros productos de la organización, amás de facese sociu o informase de les acciones entamaes por Iniciativa pol Asturianu.
Esti mes presentamos la campaña “La empresa asturiana muévese”, qu’inclúi una marca de calidá llingüística cola que queremos afalar al usu del asturianu nel etiquetaxe de productos y en xeneral, nos negocios. Pa Iniciativa pol Asturianu les empreses son parte imprescindible del procesu que tien que llevanos a un futuru meyor pal asturianu. Les empreses, como elementu imprescindible de la economía, xeneradores de riqueza y de puestos de trabayu, han tener tamién un compromisu col territoriu nel que desenvuelven la so actividá.
El Colexu Rural Agrupáu del Cabu Peñes, en Gozón, aprobó va dellos meses el cambiu pa denomase "Cabu Peñes" en llugar del castellanizáu "Cabo Peñas". Iniciativa pol Asturianu unvió una felicitación al centru aprovechando pa convidalos a siguir dando pasos na visibilidá del asturianu nel centru, talos como siguir faciendo medrar la matriculación na asignatura, usar l'asturianu na páxina web y na rotulación del centru, etc. Esti ye un nuevu exemplu que se suma a otros como los colexos xixoneses de Montiana o Xove y que surdió gracies a la propuesta d'un profesor miembru d'Iniciativa pol Asturianu y que pudo llevase alantre gracies al sofitu de tola comunidá educativa.
El pasáu 14 de xunu celebróse nel llar de la Federación Asturiana d'Empresarios (FADE) un actu nel que se presentó la campaña permanente "La empresa asturiana muévese", qu'Iniciativa pol Asturianu lleva meses preparando. La campaña quier implicar a empreses asturianes de tolos ámbitos nel usu del idioma. Pa ello nel actu cuntóse col exemplu d'empreses que yá usen l'asturianu y que se sumen a la campaña, pa dar a conocer l'ésitu d'estes iniciatives y cómo la llingua asturiana ye una ferramienta que-y da un elementu distintivu a les empreses. La campaña inclúi un Sellu de Calidá Llingüísticu que llucen yá dellos productos etiquetaos n'asturianu.
La organización Iniciativa pol Asturianu, al traviés de la so Vocalía d'Enseñu, ta acabante poner en marcha una campaña pa facer medrar la matriculación na asignatura d'asturianu nes escueles ya institutos d'Asturies, onde la demanda ye mui alta per parte de les families y alumnos, pero onde tovía apaecen importantes torgues pa matriculase na asignatura, con incumplimiento de la llexislación en dalgunes ocasiones. La campaña busca implicar al profesoráu d'asturianu con un folletu con un diseñu en blancu y negru que pueden imprentar ellos mesmos a baxu costu y según el volume d'alumnos del centru nel que trabayen.

Últimes noticies