El Día de les Lletres Asturianes ye la fecha na que tradicionalmente se sumen fuercies pa reclamar la oficialidá del asturianu nes cais d'Asturies. Dende Iniciativa pol Asturianu, pretendemos tener presencia na cai esi día tan señaláu; ye por ello qu'asitiaremos un puestu informativu na plaza de La Escandalera d'Uviéu pa dar a conocer l'asociación, aprovechando pa facer dalguna aición complementaria (repartu de folletos, venta de material,...).
Iniciativa pol Asturianu va poner a disposición de toles persones interesaes una tirada llimitada de paragües col diseñu "Nun te mueyes col agua... muéyate pol asturianu" que van ponese a a la venta nel Día de les Lletres Asturiana y dientro del puestu que va ponese na Plaza La Escandalera, asina como na Manifestación pola oficialidá, al preciu de 10 euros pal públicu y 8 euros pa los socios de la organización.
Yá ta disponible'l boletín informativu númberu 18 de la organización, coles noticies del mes d'abril. Si entá nun te llega puedes lleelu equí o apuntate con namás introducir el to corréu nel estoyu al final d'esta páxina.
Iniciativa pol Asturianu nes ondes, programa de radio d'esta organización, suma una emisora más a la so rede de difusión, que suma yá trece medios. Esti ye'l primeru que va llevar el programa hasta l'occidente d'Asturies. El programa va poder sentise tolos miércoles a les 23:30 y los sábados a les 14 hores, nel 107.5 de la FM.
Iniciativa pol Asturianu organizó dos charres informatives a lo llargo del mes d'abril y coincidiendo con actos de presentación de la revista Formientu nos que collaborá la organización en Xixón y La Foz (Morcín). Nos actos espúnxose la situación del asturianu y diose a conocer el llabor de la organización. En dambos actos delles persones sumáronse como socios a la organización.
Iniciativa pol Asturianu quier celebrar el Día del Llibru y la Selmana de les Lletres Asturianes colos sos socios. Por ello tolos que se faigan socios dende'l 23 d'abril, Día del Llibru y hasta'l 3 de mayu, Día de les Lletres Asturianes, van recibir un llibru n'asturianu de regalu nel casu de los socios simpatizantes y trés llibros pa lls socios miembru. Amás, coinciendo col Día del Llibru Asturianu, el 3 de mayu, vamos sortear un llote de llibros y revistes n'asturianu ente los nuesos socios.
La emisora uvieina Radio Qk incorpórase a la rede d'emisores qu'emiten el programa de radio de la organización Iniciativa pol Asturianu. Toles selmanes nel 107.3 Mhz de la FM n'Uviéu y la redolada va poder sentise esti espaciu radiofónicu onde se dan noticies, entrevistes y una montonera cosuques n'asturianu, embaxo la dirección de Samuel Gradín.
Dende’l nacimientu d’Iniciativa pol Asturianu tenémoslo mui claro, la presencia de la organización nes cais ye imprescindible nel trabayu a favor del idioma. Los asturianos viven tovía con munchu desconocimientu la situación llingüística del país. Les aliministraciones encargáronse con muncha eficacia de torga-yos l’accesu a la información sobre la so llingua, sobre la situación que vive y sobre les soluciones. Y en munchos casos encargóse d’introducir prexuicios y falses idees na sociedá.
El programa radio d'Inicitiva pol Asturianu, dirixíu por Samuel Gradín pasa a ser selmana col envís de tar más apegáu al día tres día de les custiones que cinquen a la nuesa llingua. Asina, de magar esti mes, va ufrir a los oyentes de les emisores que collaboren cola organización y los siguiores de les nueses redes sociales, un programa selmanal de trenta minutos onde van podese sentir toles entrevistes, noticies, anuncies, etc que surdan al rodiu l'asturianu.
El llunes pasáu, 15 d’abril, nel Centru de Recursos del Conseyu de la Mocedá del Principáu d’Asturies, celebróse'l pieslle y la entrega de diplomes del I Cursu d'Asturianu n’Uviéu, qu'organiza Iniciativa pol Asturianu col encontu de l'Academia de la Llingua Asturiana (ALLA).