Iniciativa pol Asturianu celebra aconceyamientu mensual de la Xunta Direutiva pa esti sábasu 1 d'avientu a les 12.00 na aula 1 del Vieyu Institutu Xovellanos de Xixón, asitiáu na cai Xovellanos y xunto a la Plaza'l Parchís. Como siempres, la xunta ta abierta a l'asistencia de tolos socios que quieran averase, como mena de xestión abierta y tresparente de la organización, pudiendo participar na parte d'encamientos y entrugues con toles suxerencies y opiniones que deseen.
Iniciativa pol Asturianu nes ondes fala nel so sestu programa cola actriz asturiana María Cotiello y el so mozu, l’actor William Miller, d’orixe inglés y perconocíu pola so participación en series como Cuéntame o l’actual Isabel, en TVE. La militancia a favor del asturianu de Cotiello interesó a Miller pola llingua asturiana, que ta agora deprendiendo, como cuntó nel programa d’Anne Igartiburu (ver vídeu equí: http://youtu.be/ZvioQUiAcaE) Xunto a esti, otros munchos conteníos pueden sentise nesti programa.
Esti sábadu a partir dfe les ochjo la tarde, nel chigre IPA la cerverceria del millón d'Ibus (asitiada nel 7 de la cai Rufo Rendueles, El Muro, de Xixón), Iniciativa pol Asturianu organiza la presentación de "Se lo dije a la noche / Díxi-ylo a la nueche". Un llibru-dvd del escritor castellanu Juan Carlos García Hoyuelos, con poemes tornaos a toles llingües de la Península. Nel actu van participar escritores y artistes asturianos y lleoneses, cuntando tamién cola actuación de la cantadora de tonada Anabel Santiago.
Tradicionalmente centróse’l conflictu llingüísticu n’Asturies y nos gobiernos de los conceyos. Y ta claro que ye equí onde ha xugase daveres la partida del futuru del asturianu. Sicasí, nun podemos escacer que lo mesmo’l Gobiernu d’España que les instituciones europees, son responsables d’esta llingua, en cuantes que son instituciones que tamién mos gobiernen y tienen llexislaciones que-yos obliguen a facelo.
Inaciu Galán y Denis Soria, miembros de la xunta direutiva d'Iniciativa pol Asturianu, aconceyaron con Teresa Sanjurjo, direutora de la Fundación Príncipe d'Asturies, nel llar de la institución organizadora de los Premios col mesmu nome, n'Uviéu. Nel conceyu, primer contautu ente dambes organizaciones, falóse de la situación sociollingüística d'Asturies, faciendo los representantes d'Iniciativa pol Asturianu delles propuestes concretes coles que la organización camienta que "la Fundación podría facer muncho pola normalización de la llingua asturiana y pol ameyoramientu del so prestixu social".
El Conceyu Universitariu pol Asturianu (CUPA), Iniciativa pol Asturianu y l’Academia de la Llingua Asturiana (ALLA) van inaugurar la tercer edición del Cursu d’Asturianu en Xixón esti martes 13 de payares a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, el profesor del cursu, representantes del CUPA ya Iniciativa pol Asturianu, y un representante de l’Academia de la Llingua Asturiana, Pablo Xuan Manzano.
Dempués de los primeros contactos de la rolda con partíos políticos, senadores y diputaos del Congresu, yá pueden vese los primeros resultaos. Una propuesta fecha por Iniciativa pol Asturianu a les formaciones ta acabante de llegar al Senáu de la mano del senador Jesús Iglesias. Una entruga al Gobiernu d’España na que se-yos pide esplicaciones pola falta d’usu de la toponimia tradicional aprobada n’Asturies como oficial...
Iniciativa pol Asturianu nes ondes, el programa d’esta organización, ufre un avance del so próximu programa, un entrevista especial colos actores María Cotiello y William Miller. Samuel Gradín, director del programa aprovecha la recién entrevista con Miller, nel programa +Gente, na primera de TVE, onde l’actor fizo una defensa del asturianu como llingua, dempués de les entrugues d’Anne Igartiburu sobre les llingües que fala, cuando Miller, pareya de Cotiello, esplicó que ta deprendiendo asturianu recordando a l’audiencia “que ye un idioma”.
El Conceyu Universitariu pol Asturianu (CUPA) tien abiertu’l plazu p’apuntase a la que yá ye la tercer edición de los Cursos d’Asturianu en Xixón, en collaboración cola Academia de la Llingua Asturiana y qu’esti añu va organizase de forma conxunta ente’l CUPA ya Iniciativa pol Asturianu. El plazu termina a finales d’esta selmana, el 10 de payares y yá tán apuntaos dellos alumnos de fuera d’Asturies, pa los que se va facilitar el siguimientu a distancia, gracies a les nueves tecnoloxíes. Ente los alumnos matriculaos, amás d’asturianos, xente de Méxicu, Uruguái, Suiza o Xapón.
Inaciu Galán y Vítor Suárez, miembros de la dirección d’Iniciativa pol Asturianu aconceyaron esti llunes 29 d’ochobre cola diputada de Foru Asturies, Carmen Sela Fernández, en sede parllamentaria. Asina mesmo, esti miércoles 31 aconceyaron tamién, siguiendo cola so rolda de contautos con les fuercies polítiques asturianes, col senador d’Izquierda Xunida d’Asturies Jesús Iglesias y la diputada del grupu parllamentariu d'IX na Xunta Xeneral, Emilia Vázquez. Los conceyos xiraron alredor de l’actualidá del idioma y nél la organización fizo delles propuestes a dambes formaciones polítiques.