La organización trabaya pa dar a conocer les sos propuestes a toles formaciones polítiques de cara al 25-M
XIXÓN, 21/03/2012. Dellos representantes d'Iniciativa pol Asturianu participaron nun conceyu cola diputada d’Izquierda Xunida, Emilia Vázquez, esti martes pasáu, 20 de marzu. Esti conceyu encuádrase dientro de la petición fecha pol colectivu a les 22 formaciones polítiques que se presenten a les elecciones autonómiques n'Asturies el proximu 25 de marzu. Pel momentu, Iniciaitiva pol Asturianu aconceyó con Foru ya Izquierda Xunida.
Nel conceyu, Iniciativa pol Asturianu, recordó a la representante d’Izquierda Xunida la necesidá de que les fuercies polítiques usen l’asturianu nos sos anuncios electorales en valles, televisión, radio, redes sociales, amás de nes intervenciones públiques de los sos llíderes, como meyor forma d'amosar el so compromisu col idioma.
Amás, Iniciativa pol Asturianu reconoció la importancia de qu’Izquierda Xunida lleve nel so programa la reclamación d’oficialidá, y recordó a la coalición qu’hai munches posibilidaes pa normalizar l’asturianu ensin qu’esto suponga nengún gastu pa l’alministración. Iniciativa pol Asturianu ufrió a la formación tamién nesi conceyu’l so asesoramientu y collaboración en cuestiones llingüístiques.
Más contautos
El xueves, a les 18:45 Iniciativa pol Asturianu aconceyará con Bloque por Asturies-UNA-Los Verdes dientro d’esta rolda de contactos.
