La organización Iniciativa pol Asturianu vien estudiando los programes de los toles formaciones polítiques que se presenten a les elecciones autonómiques del viniente domingu 25 de marzu y detecta que cada vegada ye mayor el consensu que xenera la llingua asturiana y la so normalización. L’espaciu dedicáu a la política llingüística ye cada vegada mayor y los compromisos más importantes. Namás un partíu, UPyD, espresa la so posición contraria a la oficialidá de forma esplícita nel programa, mientres que 6 de los 10 partíos más votaos na anterior convocatoria, lleven nel programa la oficialidá del asturianu.

FSA-PSOE, FORO y PP, son les úniques fuercies que tovía nun asumen la necesidá d’oficialidánel so programa, anque incluyen cada vegada más acciones empobinaes a la normalización del idioma.

D’ente tolos programes que pudimos consultar destacamos la presencia en toos ellos de midíes favoratibles a la normalización del asturianu, especificando la necesidá d’oficialidá ente los sos promeses electorales: Izquierda Xunida, EQUO-Los Verdes, Bloque por Asturies-UNA-Verdes, IDEAS, URAS, PCPE, Andecha Astur y Partido da Terra.

Dende Iniciativa pol Asturianu recordamos que les encuestes sociollingüístiques demuestren que más del 60% de los asturianos apoyen que l’asturianu se convierta en llingua oficial n’Asturies, polo qu’entendemos que tolos partíos habríen responder a esta demanda social que ye la ferramienta de la oficialidá, imprescindible pa que podamos conservar l’importante patrimoniu cultural y económicu que ye l’asturianu.

Iniciativa pol Asturianu na campaña

Iniciativa pol Asturianu aconceyó con tolos partíos que quixeron facelo nesta campaña y ufriendo’l so asesoramientu, amás de pidir midíes más ambicioses en política llingüística, xunto a la yá mencionada necesidá de xenerar un consensu alredor de la necesidá de que se-y reconoza al asturianu l’estatus d’oficialidá, teniendo en cuenta que mientres han dase otros pasos y qu’esta nun va ser la solución definitiva pal idioma, pero sí un pasu imprescindible.