Petición a D. Carlos José Rubiera Tuya, Conceyal d’Educación, Cultura, Festexos y Universidá Popular del Conceyu de Xixón, fecha na convocatoria del Conseyu Asesor de la Llingua Asturiana de 10 de febreru de 2015:
Dempués de cuasi cuatro años de xestión d’esta Conceyalía nos qu’al nuesu xuiciu nun s’atopa nengún avance na normalización de la llingua asturiana nel conceyu de Xixón, dende Iniciativa pol Asturianu solicitamos al conceyal, qu’en numberoses ocasiones espresó la so voluntá de tomar midíes que llevaren a la normalización de la llingua asturiana, qu’aproveche estos meses últimos de mandatu pa introducir con normalidá l’usu del asturianu na actividá diaria del so departamentu.
Pa ello proponémos-y l’aplicación inmediata d’un compromisu de billingüismu nel que la llingua asturiana garre presencia nos materiales qu’asoleya esta Conceyalía y que suponen gran parte de lo espublizao por esti Conceyu, al cuntar coles competencies que más promoción xeneren.
La nuesa propuesta ye cenciella: Redacte una orde pa que tolos materiales que dependan de la so Conceyalía salgan espublizaos nes dos llingües, nel mesmu documentu (yá seya cartelu, folletu, etc.) o nel ámbitu oral (anuncios en radio, por exemplu)
El costu d’esta midida ye cero euros, pues la Conceyalía cunta con una Oficina de Normalización Llingüística preparada pa facer esti llabor y los materiales asoleyaos, impresos nuna llingua o dos, salvo que mos indique lo contrario, tienen el mesmu preciu.
Pa llevar alantre esti compromisu de billingüismu, que ta dientro del marcu llegal y respuenden al mandatu de les Ordenances Municipales de Normalización Llingüística de Xixón aprobaes nel añu 2008 y ensin llevar alantre dende entós, namás ye preciso tener la voluntá política de facelo. Y nun queremos pensar que nun la tien.
Somos quien a entender que dende la so Conceyalía nun pue tener el control de l’actividá del restu de los departamentos de l’alministación entera, pero sí de los que dependen de so. Por ello volvemos a solicita-y que recapacite y acueya esti compromisu de billingüismu pa llevar a l’actividá municipal que d’usté depende, el billingüismu nel que vive la nuesa sociedá.
Esperamos que con ello cumpla, anque seya nos últimos meses, coles espectatives que munchos punxeron n’usté, pola so trayectoria.
Entregamos la fueya pa que conste n’acta na so totalidá, como anexu.
Inaciu Galán y González
Representante d’Iniciativa pol Asturianu nel Conseyu Asesor de la Llingua Asturiana
Y col sofitu de los representantes de les entidaes miembru del Conseyu abaxo firmantes:
-Asociación Cultural L’Arribada, pol so representante y presidente Alberto Álvarez Peña
-Asociación Reciella, families pol Asturianu, pola so representante, Montse Blanco.
