La Fundación Española para la Ciencia y la Tecnología (FECYT), dependiente del Ministeriu de Ciencia, Innovación y Universidaes, nun reconoz l’asturianu como opción n’aplicación pa facer el currículum vitae normalizáu cola ferramienta de la institución. Iniciativa pol Asturianu recibió hai unes selmanes la quexa d’una ciudadana énte esta situación.
Cuando una persona tien una formación acreditada n’asturianu nun puede recoyela nel so currículum porque esta ferramienta, dependiente del Gobiernu d’España, nun reconoz l’idioma.
Por esti motivu, la organización púnxose en contacto cola Fundación Española para la Ciencia y la Tecnología pa treslladar esta situación y la rempuesta foi clara: “el editor también ofrece la opción de la inclusión, como méritos para el investigador, del conocimiento de diversos idiomas oficiales en España, como son el castellano, catalán, gallego y euskera, no siendo el “asturiano“ una de las leguas que se puede introducir como mérito de conocimiento por el investigador al no estar reconocido como lengua oficial”.
Pa Iniciativa pol Asturianu esta ye una prueba más de que la falta d’oficialidá provoca una situación de desigualdá ente la ciudadanía que tien una formación en llingua asturiana. Debío a la falta reconocimientu llegal del idioma, al traviés de la declaración d’oficialidá, ta xenerándose una situación de desigualdá ente los y les investigadores que tienen una formación en castellán o gallegu y los que tienen esa mesma formación n’asturianu.
La organización denuncia que mientres la llingua asturiana siga siendo un idioma de segunda pola falta de reconocimientu d’oficialidá, esta situación va siguir xenerando discriminaciones, dándose la ironía que mientres el Gobiernu d’Asturies apurre ferramientes pa reconocer los niveles d’asturianu nel marcu européu, dempués nun se pue recoyer esi conocimientu nin se tien esi méritu en cuenta.
Iniciativa pol Asturianu va treslladar esta reclamación a la Conseyería d’Educación del Gobiernu d’Asturies y a la Dirección Xeneral de Política Llingüística pa que puedan trabayar nesta cuestión col Ministeriu de Ciencia, Innovación y Universidaes y que l’asturianu tenga’l mesmu valor que’l restu de llingües d’España.
