Iniciativa pol Asturianu denuncia un casu nuevu de discriminación al renovar el carné d’identidá en Mieres. Un vecín d’El Poliar acudió a la Comisaría del conceyu pa camudar el DNI. Cuando solicitó que nel documentu apaeciere’l topónimu oficial del so llugar de residencia, la funcionaria que lu atendía respondió que nun yera posible porque’l decretu d’oficialización namás ta espublizáu nel BOPA, que ye d’ámbitu autonómicu, y non nel BOE, d’ámbitu estatal. Amás, añadió que “l’ordenador nun nos dexa poner el topónimu porque nun apaez nel ‘diálogu desplegable’ de la población”. El personal de la comisaría treslladó-y tamién que namás podríen incluyir el topónimu oficial El Poliar si’l ciudadanu aporta una partida de nacimientu o una disposición del BOE.
La organización de reivindicación llingüística, que yá recibiera delles reclamaciones nesi sen nel pasáu, considera mui grave que dempués de quince años después de l’aprobación del decretu de toponimia del conceyu mierense entá nun se tea respetando per parte de les diferentes entes de les alministraciones públiques del Estáu. Iniciativa pol Asturianu va treslladar esta problemática a la Conseyería de Cultura Política Llingüística y Deporte y a la dirección xeneral d’Acción Cultural y Normalización Llingüística. La entidá afala a los sos responsables a tomar midíes pa recordar a la Delegación de Gobiernu y a la Policía Nacional la validez llegal de la toponimia oficial y a reclamar l’adautación de los sistemes informáticos pa que los nomes tradicionales de los pueblos apaezan en tolos formularios y documentos.
Iniciativa pol Asturianu recuerda que la toponimia tradicional de Mieres ye oficial dende l’añu 2009 tal y como recueye’l Decretu 9/2009, de 4 de febreru, pol que se determinen los topónimos oficiales del conceyu; en consecuencia colo qu’establez la Llei d’Usu y Promoción del Asturianu. El cumplimientu de la llei en materia toponímica tien que ser d’obligáu cumplimientu pa toles alministraciones.
