La Rede Europea d’Igualdá Llingüística (ELEN, poles sos sigles n’inglés), colectivu qu’agrupa a 174 organizaciones que representen a 50 llingües y 50 millones de falantes en 25 estados de la Xunión Europea y rede de la que forma parte Iniciativa pol Asturianu dende la so fundación en 2011, presentó esta semana una encuesta del Eurobarómetru a les puertes de la convocatoria electoral del Parllamentu Européu. L’estudiu sociolóxicu analizáu por ELEN recueye qu’una gran mayoría de europeos, una media del 84%, ta d’alcuerdu en que se deben protexer les llingües rexonales o minorizaes.
L’informe tamién desplica que un 90% de los ciudadanos ente 15-24 años creyen que los europeos debieren falar a lo menos una llingua adicional. Esti datu medra a un 92% de los encuestaos españoles, el mayor valor d’ente tolos Estaos Miembros. El muestréu sociolóxicu tamién apunta que’l 76% los europeos consideren que debieren priorizase polítiques enfotaes n’ameyorar habilidaes llingüístiques. En total, un 80% ente 15-24 n’Europa, n’España tán d’alcuerdu el 84% de tolos españoles. Amás, nel trabayu sociolóxicu apaez tamién l’ampliu porcentaxe (un 84% de la ciudadanía europea) que sofita salvaguardar les llingües rexonales y minorizaes. Esti compromisu col plurillingüísmu crez hasta un 88% n’España.
Nesi sen, Iniciativa pol Asturianu considera que concebir una Asturies n’Europa ye concebir una Asturies que salvaguarda les sos llingües minorizaes, protexendo (y ampliando) los drechos de los sos falantes y promoviendo l’usu de les mesmes; d’alcuerdu cola Carta Europea de les Llingües Rexonales o Minoritaries, de la que’l Reinu d’España ye firmante, sinón acordies cola voluntá de la gran mayoría de los europeos tal como espeya l’Eurobarómetru.
Iniciativa pol Asturianu yá treslladó a varios entes europeos como’l Conseyu d’Europa les recomendaciones que propón la entidá pa salvaguardar el futuru del asturianu y los drechos de los sos falantes. A piques de celebrar la xornada electoral del Parllamentu Européu, l’asociación reclama compromisos pa defender los intereses de los falantes d’asturianu y eonaviego nel Parllamentu acordies cola voluntá de la mayoría de los ciudadanos d’España y de la Xunión y pide tamién a los candidatos que despliquen qué van faer dende’l Parllamentu Européu pola llingua asturiana.
La organización de reivindicación llingüística aprovechó’l debate sobre la reforma del Artículu 4 del Estatutu d’Autonomía y el sofitu de la gran mayoría de la ciudadanía europea tal como recueye l’Eurobarómetru pa faer un llamáu a los diputaos de la Xunta Xeneral y al Gobiernu d’Asturies reclamando midíes concretes y compromisos p’asegurar que l’asturianu y l’eonaviego cunten cola protección necesaria acordies col artículu 3.2 de la Constitución Española.
