Iniciativa pol Asturianu albidra nel anunciu del presidente Barbón una oportunidá pa consiguir un consensu sobre la oficialidá n’Asturies

> La organización reclama a les fuercies polítiques un esfuerciu d’entendimientu p’aplicar l’artículu 3.2 de la Constitución

Iniciativa pol Asturianu fai un llamáu a les fuerces polítiques con representación na Xunta Xeneral para llograr un alcuerdu políticu pa la reforma del artículu 4 del Estatutu d’Autonomía. Esti llamamientu realízase dempués de conocer l’anunciu del presidente autonómicu de convocar a los grupos parllamentarios para negociar de forma conxunta la reforma, namás del artículu 4 del Estatutu d’Autonomía pa declarar esta llexislatura l’asturianu y l’eonaviegu como llingües oficiales.

La organización de reivindicación llingüística considera que tamos énte una oportunidá d’oru pa llograr un consensu políticu de la mayoría de la cámara, que reflexa la postura mayoritaria de la sociedá asturiana, tocantes a la protección del patrimoniu llingüísticu. La entidá apunta tamién que tamos nel momentu d’abandonar complexos, postures de bloquéu y ampliar más que nunca’l consensu constitucional que garantice la supervivencia de les nueses llingües al traviés de la so reconocencia nel Estatutu d’Autonomía.

Nesi sentíu, l’asociación reclama a les fuercies polítiques un esfuerciu d’entendimientu p’aplicar l’artículu 3.2 de la Constitución Española n’Asturies. Coles mesmes, Iniciativa pol Asturianu ufierta la so collaboración a les distintes organizaciones polítiques, pa llograr esi gran alcuerdu que la sociedá asturiana lleva reclamando dende va 50 años.