Los persones que trabayamos pol futuru de la llingua asturiana, tamos avezaos a llevar golpes. Tanto que paez que cuando consiguimos pequeñes victories nel camín, nun sabemos xestionales.
Ye importante tresmitir a la sociedá, y a la xente que trabaya pol idioma ensin descasu, estos avances, les bones noticies pa la nuesa llingua. El llabor que facéis cada día pol idioma, tien utilidá, da resultáu, y la sociedá asturiana, recibe eses noticies con entusiasmu.
2014 tien que se un añu nel que consolidemos pasos alantre daos en 2013:
Visto l’ésitu de la presencia del asturianu na televisión pública, hai que facer por consiguir una televisión asturiana onde la llingua normal seya la propia d’Asturies. Tien que ser normal ver películes doblaes, informativos n’asturianu, producciones propies na nuesa llingua…
La nueva llei d’educación tien que sirvir pa que forcemos al Gobiernu d’Asturies a meyorar la presencia de la llingua asturiana nos centros educativos, agora que va tar en manes autonómiques esta cuestión.
Nel ámbitu estatal, 2014 tien que ser l’añu nel que’l Congresu apruebe unos Presupuestos Xenerales del Estáu onde esistan partíes pal asturianu. Tenemos que siguir ganando espacios n’igualdá de condiciones coles demás llingües del Estáu.
Por supuestu, siguiremos reclamando l’irrenunciable drechu de la comunidá asturfalante, a que la so nuesa llingua seya oficial, como les demás. Pero esta reivindicación nun pue paralizanos a la espera. La oficialidá consiguirémosla –pues nunca “llegará” como cayida del cielu- a base de trabayu, convenciendo a la sociedá asturiana y a la clas política de que ye xusto y sobre manera al siguir faciendo del asturianu una llingua normal d’usu nel día a día.
Porque cada pasu alantre nuevu, tien la fuercia de dexanos un pocoñín más cerca del día en que consigamos facer a la nuesa maltratada llingua, un pocoñín más normal, al traviés de la declaración d’oficialidá.
