“Vamos pedir un conceyu urxente cola Conseyera d’Educación pa tresmitir la necesidá de facer presión nel Ministeriu d’Educación p’aclarar la necesidá de la especialidá docente”

“De manera especial, recordamos la necesidá d’una partía pa l’ALLA dientro de los futuros PXE y de la importancia de la creación de la especialidá docente d’asturianu”

“Vamos organizar, xunto col Centru Asturianu de Madrid, el Día de les Lletres en Madrid; un concursu lliterariu n’asturianu y tamién actos en defensa de la oficialidá na capital d’España”


 

XIXÓN, 13 DE FEBRERU DE 2020. Iván Llera, presidente d’Iniciativa pol Asturianu, dio una rueda de prensa pa facer una valoración de los alcuentros que mantuvo la organización con representantes de PSOE, PP, Podemos y Foro nel Congresu de los Diputaos. El presidente de la organización dixo que “agradecemos a les diferentes fuercies polítiques la so voluntá p’aconceyar con nós y tar atentos a les peticiones que-yos ficimos en materia llingüística”.

Llera apuntó que “quiximos insistir na necesidá del cambiu del Decretu d’Especialidaes pa iguar d’una vegada la situación del profesoráu d’asturianu. Esta propuesta yá s’aprobó na Xunta Xeneral del Principáu cola unanimidá de tolos partíos, polo tanto, entendemos que nun habría nengún motivu pa nun facela”.

Nesi sen, Iván Llera dixo que “nun entendemos que la modificación del decretu d’especialidaes dependa de la oficialidá. Solo fai falta voluntá por parte de los responsables políticos. Necesitamos iguar esta situación inxusta pa los profesores d’asturianu porque esta situación xenera interinidá, precariedá y esa modificación permitiría amás dignificar l’asignatura”.

El presidente d’Iniciativa anunció que “vamos pedir un conceyu urxente cola Conseyera d’Educación pa tresmitir la necesidá de facer presión nel Ministeriu d’Educación p’aclarar esta cuestión. Consideramos que nun ye aceptable esta situación y vamos reclamar soluciones. Esti tema nun puede esperar pola oficialidá”.

Iván Llera comentó que “manifestamos la necesidá de que l’ALLA cuente con una aportación propia nos próximos Presupuestos Xenerales del Estáu pa igualáse al restu de les instituciones d’esti tipu y al restu de les llingües d’España”. Llera recordó que “n’anteriores llexislatures fueron varios partíos los que presentaron enmiendes pa que l’Academia de la Llingua Asturiana cuntare con financiación estatal, ente ellos, los qu’agora son partíos con responsabilidaes de Gobiernu, polo tanto, creemos que nun tendría qu’haber problema pa que nel futuru proyectu de presupuestos apaezca esti importe”.

El cabezaleru destacó que “cola presentación del manifiestu Pluralidá llingüística: Llibertá, igualdá y democracia dimos voz a la situación de les llingües que tovía nun tienen status d’oficialidá n’España como ye’l nuesu casu o del casu del aragonés.

Llera aprovecho tamién p’anunciar que “dende Iniciativa pol Asturianu vamos organizar, xunto col Centru Asturianu de Madrid, el Día de les Lletres en Madrid; un concursu lliterariu n’asturianu y tamién actos en defensa de la oficialidá na capital d’España”.