“Güei ye un día de reconocimientu y d’homenaxe a toles persones que queremos un futuru pal nuesu idioma y a tolos falantes d’otres llingües minorizaes”

“L’asturianu, al igual, que les otres 7000 llingües qu’hai, ye una riqueza cultural a nivel global que nun podemos dexar desapaecer porque fadríanos mas probes culturalmente a nivel mundial”

“Tamos nel meyor momentu políticu de la hestoria pal asturianu y esto tien que valir pa dar pasos allantre na normalización de la llingua asturiana” 

“Iniciativa pol Asturianu recuerda que la oficialidá ye una ferramienta mui útil pa consiguir da-y futuru al asturianu nun marcu constitucional d’igualdá, pluralidá, respetu y llibertá”

XIXÓN, 21 DE FEBRERU DE 2020. Iván Llera, presidente d’Iniciativa pol Asturianu, aprovechó esti Día de la Llingua Materna pa facer unes declaraciones sobre la situación de la llingua asturiana. Llera dixo que “nesti Día de la Llingua Materna dende Iniciativa pol Asturianu facemos un llamáu a tolos representantes políticos a trabayar nel consensu pa garantizar el futuru del asturianu en llibertá”. El cabezaleru apuntó tamién que “les llingües nun tienen ideoloxía. Son parte del nuesu patrimoniu cultural, son una manera de comunicase y nun deben utilizase como arma política pa dividir a la sociedá”.

Nesi sen, el representante remarcó que “l’asturianu, al igual, que les otres 7000 llingües qu’hai, ye una riqueza cultural a nivel global que nun podemos dexar desapaecer porque fadríanos mas probes culturalmente a nivel mundial y sedría una perda pal conxuntu de la humanidá. Güei ye un día de reconocimientu y d’homenaxe a toles persones que queremos un futuru pal nuesu idioma y a tolos falantes d’otres llingües minorizaes”.

El presidente comentó que “esti idioma forma parte d’una herencia cultural que mos toca conservar, seguir manteniendo vivu y consiguir tresmitilu a les xeneraciones futures”.

Iván Llera manifestó que “tamos nel meyor momentu políticu de la hestoria pal asturianu y esto tien que valir pa dar pasos allantre na normalización de la llingua asturiana. Y esa normalización tien que nacer d’un consensu de toles organizaciones polítiques porque esti idioma ye un patrimoniu de toos y toes”.

Llera destacó que “Iniciativa pol Asturianu recuerda que la oficialidá ye una ferramienta mui útil pa consiguir da-y futuru al asturianu nun marcu constitucional d’igualdá, pluralidá, respetu y llibertá”.