La organización pidi incluyir que les llingües nun seyan elementos de discriminación
Iniciativa pol Asturianu plantega que’l testu final s’asoleye nel BOPA y amás de forma billingüe
XIXÓN, 2 DE MARZU DE 2020. Iniciativa pol Asturianu presentó güei un escritu d’observaciones y suxerencies al borrador del Códigu Éticu presentáu pola Universidá d’Uviéu va unes selmanes.
El documentu recueye na Parte II, nel artículu 5 que “En el desarrollo de la docencia se respetarán los derechos del estudiantado, sin realizar discriminación alguna por causa de religión, etnia, sexo, identidad de género y orientación sexual, clase social o cualquier otra circunstancia personal o social”.
Nesi sentíu, la organización propunxo incluyir dientro d’esa llista que l’usu de cualesquier llingua (con especial atención a la llingua asturiana) tampoco seya motivu de discriminación dientro del espaciu académicu. La entidá tamién pide incluyir esta aclaración dientro de la Parte III del Artículu 4.
La organización yá denuncio varies situaciones de discriminación llingüística, y tovía siguen llegando quexes, pol usu llibre del asturianu dientro de la institución académica, por ello ye importante qu’esti documentu recueya que l’espresase n’asturianu nun seya un motivu de discriminación nin xenere dificultaes dientro de la Universidá d’Uviéu.
Amás, dende la organización pídise que dientro del apartáu “Principiu y valores comunes” recueya una mención propia al asturianu. La propuesta que se fae dende Iniciativa ye: “Promoveráse’l respetu y la promoción de la diversidá llingüística en toles actividaes de la Universidá, con especial atención al cuidáu pa con los usuarios de la llingua asturiana, como llingua en situación de minorización protexía polos Estatutos d’esta institución”.
P’acabar, Iniciativa pol Asturianu plantega nel documentu que’l testu final s’asoleye nel BOPA, amás de forma bilingüe (asturianu/castellán).
