La organización ufierta en formatu PDF los documentos del alcuentru del 2018 y los vídeos del pasáu añu 2019

Iniciativa pol Asturianu va dir publicando los vídeos nes sos páxines corporatives en redes sociales y el documentu en PDF na so propia web

XIXÓN, 18 DE MARZU DE 2020. Iniciativa pol Asturianu fixo público güei que va ufiertar les actes íntegres en formatu PDF del Seminariu “Oficialidá, el camín constitucional del futuru pal asturianu” del añu 2018. Esti interesante documentu recueye diferentes ponencies sobre la oficialidá con interesantes datos y reflexones xurídiques, educatives, culturales y de calter económicu  como ye’l casu del profesor d’Economía Aplicada de la Universidá d’Uviéu, Xosé Alba, baxo’l títulu “Aspectos económicos de la oficialidá: nin tantu coste nin namás coste”, o la conferencia de José Manuel Pérez Fernández, lletráu del Tribunal Constitucional, “Constitución y llingües: oficialidá, conteníu y desendolque”. Otros ponentes son Xuan Bello, Francisco José Llera Ramo, Isabel Hevia Artime y Xosé Antón González Riaño. El documentu va poder descargase dende la propia páxina web de la organización.

Amás, a lo llargo d’estos díes la entidá va dir publicando nes sos redes sociales los vídeos coles diferentes intervenciones del seminariu del pasáu añu 2019. Ente eses intervenciones hai meses redondes y ponencies. De manera concreta hai dos conferencies que son la de Leopoldo Tolivar Alas, Calderalgu de Drechu Alministrativu de la Universidá d’Uviéu, baxo’l títulu “L’asturianu nel marcu constitucional. ¿Fai falta la oficialidá?” y la de Víctor Manuel Vázquez Portomeñe, ponente del Estatutu d’Autonomía gallegu y ex Conseyeru d’Educación y Cultura de Galicia por el PP, que disertó sobre “El desarrollu de la oficialidá en Galicia, un modelu p’Asturies”. Les meses redondes trataron sobre diferentes temes: la oficialidá una cuestión pendiente na política asturiana, el papel de los medios de comunicación, el sistema educativu y el funcionariáu o el papel de los servicios de normalización.

Los vídeos podrán vese nes redes sociales d’Iniciativa pol Asturianu y na canal de Youtube.

ACTES SEMINARIU-impr