La organización va ufriendo a lo llargo’l día los videos nos sos perfiles d’Instagram, Twitter, y Facebook

“Ye una bona manera d’amosar la cantidá de bonos escritores que tenemos n’asturianu y averálos a la sociedá nesti momentu”

“D’esta manera tamién queremos dar visibilidá a les muyeres que son escritores n’asturianu”

XIXÓN, 21 DE MARZU DE 2020. Iniciativa pol Asturianu aprovechó la xornada de güei pa facer un llamamientu a los escritores n’asturianu y gallego-asturianu pa grabar un videu lleendo dalguna obra poética propia o de terceros y facelu llegar al traviés de les redes sociales de la organización a tola sociedá.

La organización va ufriendo los videos nos perfiles corporativos que tien n’Instagram, Twitter y Facebook. A la iniciativa sumáronse yá dellos escritores como Susana Sela, Xuan Miyar, Alba Carballo, Inaciu Galán, Marta Mori, María Esther García López, Alfredo Garay, Chechu García, Mercedes de Soignie, Crisitina Menéndez, ente otros.

Iniciativa pol Asturianu quier d’esta manera celebrar con esta llectura dixital el Día Mundial de la Poesía. Amás dende la organización quierse dar una visibilidá a la lliteratura asturiana y averala a la sociedá nesti momentu complicáu d’andanciu. Tamién ye una manera de dar visibilidá a la bayurosa cantidá de muyeres escritores qu’utilicen la llingua asturiana y el gallego-asturianu, lo que ye un arguyu pa la nuesa sociedá.

Los vídeos podrán vese nes redes sociales d’Iniciativa pol Asturianu como Instagram (@iniciativaxast), Facebook (Iniciativa pol Asturianu) y Twitter (@IniciativaxAst).