Dempués de conocese la noticia de l’anulación de les ordenances d’asturianu de Mieres pol TSXA, Ivan Llera, presidente d’Iniciativa pol Asturianu comentó que “dende Iniciativa pol Asturianu llamentamos esta postura del PP escontra cualquier llexislación que permita l’usu llibre del asturianu nos conceyos”.

Llera comentó que “los planes de normalización y les ordenances lleven décades funcionando ensin nengún tipu de problema xurídicu en munchos conceyos asturianos y la Llei d’Usu del asturianu permite a los conceyos esti tipu de midíes, tal y como yá afitó nun informe xurídicu’l Gobiernu d’Asturies va unos años”.

El presidente de la entidá recordó que “l’asturianu tien que xenerar consensu. Nun puede ser un motivu pa xudicializar el funcionamientu d’un conceyu y utilizar una cuestión alministrativa pa dir contra la llingua asturiana”.

P’acabar, Iván Llera dixo que “nun se puede mantener dos postures sobre l’asturianu distintes al mesmu tiempu: el PP cuélgase la medalla d’aprobar la Llei d’Usu pero intenta baltiar, al mesmu tiempu, tolos avances que se dean amparaos dientro d’ella”.