“Dende Iniciativa pol Asturianu vamos participar nesti espaciu pa facer llegar propuestes y proyectos pa siguir trabayando na normalización social del idioma”
“Como ya facemos nel Conseyu Asesor de Xixón queremos siguir siendo l’altavoz de la ciudadanía y treslladar los problemes que tantes vegaes s’atopen al usar llibremente la lllingua asturiana”
XIXÓN, 21/10/2020. Iván Llera, presidente d’Iniciativa pol Asturianu, va ser el representante de la organización nel nuevu Conseyu Asesor de Política Llingüística entamáu pola Conseyería de Cultura del Gobiernu d’Asturies. Nesi sentíu, el presidente de la entidá apuntó que “celebramos la constitución del Conseyu Asesor de Política Llingüística como un espaciu pal trabayu, la participación y la reivindicación de los drechos llingüísticos de los y les falantes d’asturianu. Dende la nuesa organización queremos agradecer esta convidada pa formar parte d’esti nuevu muérganu”.
Llera recordó que “esta foi una propuesta que ficimos dende Iniciativa pol Asturianu a los representantes de la Conseyería y que por fin ve la lluz. Ye una bona noticia ver cómo apaez un nuevu espaciu pal alderique sobre la política llingüística a esti nivel”.
El representante de la organización añadió que “dende Iniciativa pol Asturianu vamos participar nesti espaciu pa facer llegar propuestes y proyectos pa siguir trabayando na normalización social del idioma”.
El presidente d’Iniciativa pol Asturianu remató diciendo que “como ya facemos nel Conseyu Asesor de Xixón queremos siguir siendo l’altavoz de la ciudadanía y treslladar los problemes que tantes vegaes s’atopen al usar llibremente la lllingua asturiana”.
