La entidá recuerda que yá van varios de casos d’esti tipu y que la meyor solución pa iguar de manera definitiva esti problema ye la declaración d’oficialidá

Iniciativa pol Asturianu solicita a la institución una modificación del Reglamentu que permita que puedan presentase les tesis y cualquier trabayu n’asturianu 

XIXÓN, 15/10/2020. Iniciativa pol Asturianu denuncia un nuevu casu de discriminación llingüística na Universidá d’Uviéu. Nesti casu un estudiante del gráu d’Historia decidió escoyer l’asturianu como llingua pa entregar y defender el so trabayu, a la hora de la realización del TFG. Dende’l momentu nel qu’esto foi comunicáu a los docentes que dirixirán esti TFG, tuvo tol sofitu, ensin nengún problema cola llingua escoyida.

Sicasí, díes dempués, comunicóse al alumnu que nun yera posible facelo utilizando la llingua asturiana, non pola negativa de los docentes, sinón por mor de l’alministración, que niega los drechos llingüísticos na memoria de verificación del Grau d’Historia na Universidá d’Uviéu, yá que namás se llimita al castellán.

Iniciativa pol Asturianu denuncia qu’esta decisión de nun poder presentar el TFG utilizando l’asturianu ye contraria a los Estatutos de la Universidá, pues la norma interna de la Universidá d’Uviéu recueye que «naide podrá ser discrimináu pol usu del asturianu». Amás, dende la organización recuerden nesi sentíu, la Llei 1/ /1998, de 23 de marzu, d’Usu y Promoción del Asturianu permite a la ciudadanía dirixise de manera llibre a l’alministración utilizando la llingua asturiana, asina como a la normativa de presentación d’estos trabayos.

La entidá recuerda que yá van varios de casos d’esti tipu y que la meyor solución pa iguar de manera definitiva esti problema ye la declaración d’oficialidá pa la llingua asturiana pa llograr d’esta manera la igualdá de drechos y que naide tenga torgues a la hora d’usar la llingua que llibremente decida.

Iniciativa pol Asturianu pide a la Universidá d’Uviéu que garantice’l drechu al usu llibre del asturianu na presentación del TFG y solicita a la institución una modificación del Reglamentu que permita que puedan presentase les tesis y cualquier trabayu n’asturianu n’igualdá de condiciones a la presentación en castellán.