“Esta ye una reclamación hestórica de la nuesa organización y qu’alcontró sofitos en PP, PSOE, IX, Podemos o FORO” 

La entidá recuerda qu’esta cuantía iguala l’asturianu coles demás llingües d’España y en definitiva llogra poner nel llugar que-y cuerrespuende a la institución más importante pal idioma

XIXÓN, 9/10/2020. Iniciativa pol Asturianu reclama’l compromisu del Gobiernu d’España y de los partíos pa cuntar con una partida pa l’Academia de la Llingua Asturiana nel borrador de los Presupuestos Xenerales del Estáu. Iván Llera, presidente d’Iniciativa pol Asturianu, recordó que “va unos meses aconceyamos en Madrid con diputados y senadores de PSOE, PP, Podemos y FORO pa recordar la necesidá de que l’Academia cuente con una aportación estatal como’l restu de les academies de les llingües d’España y tolos y toles diputaes entendieron esta cuestión”.

“Esta ye una reclamación hestórica de la nuesa organización y qu’alcontró sofitos a lo llargo de casi 10 años de trabayu en diferentes partíos en PP, PSOE, IX, Podemos o FORO. Cuando aconceyamos colos representantes asturianos nes Cortes siempres atienden esta reclamación” apuntó Llera.

El presidente de la organización recordó que “esta cuantía iguala l’asturianu coles demás llingües d’España y en definitiva llogra poner nel llugar que-y cuerrespuende a la institución más importante pal idioma”.

Pa finar Llera dixo que “facemos un llamáu al Gobiernu d’España pa llograr igualdá pal idioma na cuestión de la financiación de l’Academia de la Llingua”.