La organización ufierta nuevos cursos de llingua asturiana (nivel básicu 1 y nivel básicu 2) que van facese a distancia

XIXÓN, 26/10/2020. Iniciativa pol Asturianu abrió’l plazu de matriculación p’apuntase a los nuevos cursos de llingua asturiana (nivel básicu 1 y nivel básicu 2) que van facese pola vía a distancia, al traviés d’una plataforma dixital.

Los cursos van tener una duración de 36 hores llectives y van entamar el lunes 16 de payares y acabaríen a entamos de febreru, aproximadamente.

El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.

El nivel II ta empobináu a persones con una conocencia más fonda del idioma, que yá ficieren dalgún cursu enantes.

El preciu de la inscripción ye de 60,00 € (50,00 € pa los socios d’Iniciativa pol Asturianu).

Les inscripciones pal cursu pueden facese nun formulariu na propia páxina d’Iniciativa pol Asturianu, onde tamién s’alcuentren toles condiciones pal mesmu. El plazu d’inscripción acaba’l 12 de payares.

FORMULARIU D’INSCRIPCIÓN CURSOS A DISTANCIA 2020