“Ye incomprensible qu’un alcalde de la FSA-PSOE nun almita una moción pola cenciella razón de que tea escrita n’asturianu”

“Encamentamos a Ángel García a facer un repasu al programa electoral col que’l PSOE se presentó a les elecciones de mayu de 2019”

“Güei Iniciativa pol Asturianu cumple 9 años de trabayu y situaciones como estes siguen afitando la necesidá d’una organización asina y de la oficialidá del asturianu”

XIXÓN, 29/10/2020. Iniciativa pol Asturianu muestra públicamente l’enfadu de la organización pola refuga a una moción de Somos nel plenu de Siero. Iván Llera, presidente d’Iniciativa pol Asturianu, comentó que “ye incomprensible qu’un alcalde de la FSA-PSOE nun almita una moción pola cenciella razón de que tea escrita n’asturianu. Tamos nun momentu de másimu consensu alredor del idioma, sumando voluntaes y dando pasos a favor de la normalización de la llingua asturiana. Nun podemos permitir estes situaciones”.

Llera apuntó que “l’asturianu nunca foi un problema nel conceyu de Siero. Nin na mesma bendición de los Güevos Pintos que se fae n’asturianu como pa qu’agora nun se pueda falar asturianu nun plenu. Encamentamos a Ángel García a facer un repasu al programa electoral col que’l PSOE se presentó a les elecciones de mayu de 2019”.

Iván Llera acabó diciendo que “güei Iniciativa pol Asturianu cumple 9 años de trabayu y situaciones como estes siguen afitando la necesidá d’una organización como la nuestra y evidencien la necesidá d’igualar drechos entre la ciudadanía cola oficialidá del asturianu”.