La organización tien constancia d’un casu nel IES Aramo d’Uviéu nel que se modificó la matrícula ensin permisu del alumnu
Iniciativa pol Asturianu yá treslladó a la Conseyería ya la Dirección Xeneral de Política Llingüística esta situación
XIXÓN, 10/11/2020. Iniciativa pol Asturianu denuncia qu’estudiantes d’asturianu siguen ensin profesor a estes altures del cursu. La organización recibió varies quexes de diferentes centros d’Asturies con esta problemática qu’ocurre en centros tanto públicos como concertaos. Dende la entidá yá se treslladó a la Conseyería d’Educación y a la Dirección Xeneral de Política Llingüística una montenera de reclamaciones de calter educativu al traviés d’un informe nel que se señalaben situaciones graves dentro de l’asignatura de Llingua Asturiana.
De manera concreta, la organización tien constancia d’un casu nel IES Aramo d’Uviéu nel que se modificó la matrícula ensin permisu del alumnu y polo tanto, l’estudiante ta cursando una asignatura que a la que nun s’apuntó. Esto ocurrió ensin avisu previu a la familia nin al estudiante. Al pedir cuentes a los responsables del institutu, éstos animen al alumnu, menor d’edá, a dir a otru centru educativu (a cursar l’asignatura), cuando nel centru hai profesor de Llingua Asturiana y Lliteratura y namás sedría necesario amplia-y la xornada.
Dende Iniciativa pol Asturianu, consideramos esta, una situación de marxinación y maltratu al alumnu, contrariu a la llexislación vixente y esiximos a la Dirección del Centru que ponga solución inmediata, yá que l’estudiante ta nesti momentu treslladáu a otra asignatura que nun escoyó. Pa ello, amparámonos na Llei 1/98 de 23 de Marzu, d’Usu y Promoción del Asturianu (BOPA Númb.73, del 28-III-98) y na sentencia ratificatoria del Tribunal Supremu d’abril de 2012.
Asinamesmo, pidimos a la Conseyería d’Educación una investigación interna pa saber quien foi la persona que modificó, ensin nengún tipu de permisu atentando contra la voluntá del estudiante y la so familia, el documentu oficial de la matrícula.
La organización anima a los representantes de la Conseyería d’Educación a facer un esfuerzu pa qu’estes situaciones nun vuelvan a ocurrir y en tou casu facer llegar a los centros la obligación de respetar la voluntá de les families.
