La cantidá d’esta partida, 40.000 euros, entá nun equipara a la institución asturiana col restu d’academies, pero ye un pasu clave pa siguir trabayando
Esta ye la prueba de que la llingua asturiana necesita más que nunca trabayu en positivu, esfuercios y siguir sumando a xente de diferentes ideoloxíes a la defensa del idioma
Iniciativa pol Asturianu agradez el trabayu de los diputaos y d’aquellos que nestos años trabayaron por construyir el consensu dende distintes fuercies polítiques
XIXÓN, 10/11/2020. Una enmienda de PSOE y Podemos a los sos propios presupuestos va garantizar qu’esti añu viniente l’Academia de la Llingua Asturiana tenga una partida nos presupuestos estatales, como llevaba reclamando Iniciativa pol Asturianu dende 2012.
Toles academies de les llingües el estáu (castellán, gallegu, vascu y catalán) cunten dende va décades con partíes presupuestaries nos PXE, pero la entidá asturiana nun cuntaba con ella. En 2012, poco dempués de la so fundación, Iniciativa pol Asturianu reclamó un cambiu nesta cuestión a los partíos que representaben entós a Asturies nel Congresu y nel Senáu.
Una visita del entós presidente d’Iniciativa pol Asturianu, Inaciu Galán, a Madrid, foi l’entamu de les conversaciones coles formaciones polítiques y de la construcción d’un consensu nesta cuestión. Nestos años partíos de cásique tol arcu parllamentariu sofitaron esta propuesta presentando enmiendes a los proyectos de presupuestos que nun tuvieron ésitu suficiente p’aprobase, pero que fueron construyendo’l camín p’algamalo nesta ocasión.
En febreru de 2020, una delegación d’Iniciativa pol Asturianu encabezada pol actual presidente Iván Llera, visitó de nuevo a los diputaos y diputaes asturianos nel Congresu, en Madrid, pa consiguir qu’esti añu’l cambiu fuera posible. Magar les dificultaes d’un momentu complicáu por razones evidentes, y anque nel proyectu orixinal de presupuestos la partida nun apaez, el trabayu conxuntu con diputaos y diputaes asturianos, fixo que’l llogru fuera posible esti añu. Una enmienda conxunta de PSOE y Podemos, trabayada especialmente polos diputaos Roberto Morís y Sofía Castañón, va permitir nesta ocasión que per primer vegada na hestoria l’Academia de la Llingua Asturiana cunte con una partida.
La cantidá d’esta partida, 40.000 euros, entá nun equipara a la institución asturiana col restu d’academies, pero ye un pasu clave pa siguir trabayando en futuros presupuestos y una reconocencia a nivel estatal pionera na hestoria. Nunca enantes una partida de los PXE tuvo dedicada a la promoción del asturianu.
Esta ye la prueba de que la llingua asturiana necesita más que nunca trabayu en positivu, esfuercios y siguir sumando a xente de diferentes ideoloxíes a la defensa del idioma. Tenemos que siguir sumando voluntaes y dando pasos a favor de la normalización social del idioma.
Dende Iniciativa pol Asturianu queremos agradecer el trabayu de los diputaos y diputaes implicaos nesta propuesta, d’aquellos que nestos años trabayaron por construyir el consensu dende distintes fuercies polítiques y tamién a tolos nuesos asociaos ya asociaes porque dempués de casi 10 años de trabayu gracies a ellos y elles siguimos consiguiendo ésitos pa esti idioma.
