La organización esixe la presencia normal del idioma na nomenclatura de les diferentes especies d’árboles presentes nel parque d’Uviéu
“L’usu de los nomes tradicionales de los árboles val pa que les nueves xeneraciones sigan usando pallabres como faya, carbayu o texu”
“Esta propuesta nun va xenerar costu adicional pal Conceyu a la hora de la colocación de la nueva señalética. Con voluntá puede dase promoción a la llingua asturiana de manera gratuita”
UVIÉU, 03/12/2020. El Conceyu d’Uviéu anunció va unes selmanes diferentes reformes ya intervenciones pa meyorar el Campu San Francisco de la capital asturiana. Nesi sentíu, tamién va anovase la señalética y por ello, Iniciativa pol Asturianu reclama la presencia del asturianu nos nuevos paneles informativos.
La organización apunta que “esta propuesta nun va xenerar costu adicional pal Conceyu a la hora de la colocación de la nueva señalética. Con voluntá puede dase promoción a la llingua asturiana de manera gratuita”.
“Ye importante facer un usu normal de la llingua asturiana nos conceyos, amás de facelo pa elementos naturales como ye nesti casu la propia botánica. Nuna ciudá onde’l xentiliciu popular fai alusión a un árbol, esperamos alcontrar tamién referencies a los nomes n’asturianu de los diferentes árboles y plantes que podemos alcontrar nel espaciu” apunten dende la entidá.
Pa terminar dende Iniciativa pol Asturianu aclararon que “esta midida nun va xenerar costu adicional pal Conceyu a la hora de la colocación de la nueva señalética. Con voluntá puede dase promoción a la llingua asturiana de manera gratuita”.
