Iniciativa pol Asturianu considera inxustificable la eliminación de los Presupuestos Xenerales del Estáu (PXE) de la partida de 1,6 millones d’euros destinada a la promoción y difusión de les llingües protexíes pola Carta Europea de les Llingües Rexonales o Minoritaries. A Asturies correspondiéron-y un total de 290.000 euros conseñaos nesti epígrafe, del que tamién salíen beneficiaes Aragón, Cataluña, Comunidá Valenciana, Galicia, Islles Baleares, Navarra y País Vascu. Esta aportación, presente nes cuentes del añu en cursu, salió alantre gracies a una enmienda de Compromís nel Senáu nel trámite del presupuestu.
La organización censura la supresión d’esta partida que suponía un gastu de 1,5 millones d’euros sobre los 485.000 millones de los PXE y que, pa la llingua asturiana, tradicionalmente escaecida a nivel estatal pola falta d’oficialidá, suponía una cantidá bien interesante pa desendolcar polítiques de normalización llingüística. Iniciativa pol Asturianu reclama la recuperación d’esta partida y reclama a los grupos parlamentarios proponer enmiendes pa recuperar esti importe nel proyectu de presupuestos estatales pal añu 2023.
Per otru llau, la organización de reivindicación llingüística quier celebrar l’incrementu de l’aportación a l’Academia de la Llingua Asturiana nos PXE en 10.000 euros. Esta partida incorporóse per primer vegada nel exerciciu 2020 depués de munchos años de trabayu y de reclamaciones d’Iniciativa pol Asturianu. Una aportación que ta yá afitada, pero que tovía ta lloñe d’equiparase a les aportaciones que reciben les demás academies de les llingües del Estáu.
